Fuafua Ekalesia Metotisi Tutufaatasi e fau se nofoaga mo tagata matutua

“O le galuega misiona lea a le ekalesia o le faaola agaga ma fesoasoani i tagata”…Rev Sione Leota

O le tausaga e 2001 na faavae ai le ekalesia Metotisi Tutufaatasi le United Methodist na taulamua ai le susuga i le faafeagaiga o Sione Leota. O lea ua savalia le 13 tausaga ma masina talu ona faatū e pei ona tolu aulotu i Aukilani i Niu Sila ae tasi i Samoa lea o loo i Vaitele fou.

Pe a vaavaai e lei leva ona faatū le ekalesia ae ua silasila nei le Taitai Aoao ma aulotu e fā i lana uluai fonotaga tele faaletausaga ua usuia i Samoa e faagaioi nisi o atinae lelei mo tagata. O se nofoaga mo tagata matutua ma se nofoaga e nonofo ai tina ma tamaitai faapea fanau ua sauāina o se poloketi lea a le ekalesia ua silasila i ai.

“O le galuega misiona lea a le ekalesia, o le faaola o agaga ma fesoasoani i tagata. E le mafai ona taunuu aoaoga faakerisiano i lona ooooga pe a aunoa ma le faatino o galuega e laveaina ai nisi agaga ua satia i amioga solitulafono a isi tagata”, na saunoa ai le Taitai Aoao o le Metotisi Tutufaatasi, susuga Sione Leota. O se tasi o vaega tāua o le fono tele muamua ua usuia a lenei ekalesia i Samoa talu ona faatūina, o le umusaga poo le faaulufaleina o le Malumalu o le ekalesia Metotisi Tutufaatasi i Vaitele fou.

Na faamatala e le Taitai Aoao nisi o faaletonu na aafia ai le galuega i lona amataga. O se faifeau na uluai filifilia e tausia le aulotu a o faia tapuaiga i se fale lē tumau, na ia tuua le galuega ma agai i se isi ekalesia ese, ona ua manumalo tala ma musumusuga mai tua faapea isi tagata na faavaivaiina ai le talitonuga e tupu le galuega.

“A alu atu lana susuga i Niu Sila e fai le tali lauga e $2,000 ma le faaoso ona foi mai lea, peitai na matou faalogo mai ua ia tuua le ekalesia ona ua malosi musumusuga mai tua ia i latou sa leai se ola talitonu”.
Na sosoo ma se isi faifeau na filifilia ae peitai na alu alu foi, tuua e lea faifeau le aulotu ona o le faafitauli lava lea e tasi. Na alu ese lea faifeau ma ave uma mea o le fale o le galuega ae taatia ai na o le atigi fale e pei ona saunoa le Taitai Aoao i le sauniga na umusa ai le malumalu. O le tau o lea galuega e silia i le selau afe. Na faatupe i se fesoasoani a aulotu e fā i Niu Sila ma le sao o le aulotu i Vaitele fou.

O le umusaga na auai le aumalaga a aulotu e fā mai Niu Sila ma sui o le ekalesia e tasi i Samoa le aulotu i Vaitele fou. Na faatini ai foi e le afioaga o Toamua i le tofa i Igoa-Matua Ale ma ‘Ulu se inu ma se laulautasi lea na faaaloalo foi i ai le Taitai Aoao, o se tamafanau a le afioaga ma le ekalesia aoao i seleni ma palapala a malo.

O loo fai malologa pea i Samoa le usugafono mai Niu Sila ona ua maua foi lea avanoa e asiasi i aiga ma nuu ona toe taliu ai lea o le uta i Niu Sila auā le faaauauina o galuega masani.

Le Malumalu muamua o le ekalesia Metotisi Tutufaatasi ua mae‘a fausia i Samoa ma ua umusa. O se galuega na tutu faatasi ai aulotu e fā o le ekalesia e limalima faatasi lona faatupeina

Le susuga i le faafeagaiga Sione Leota o le Taitai Aoao o le Ekalesia Metotisi Tutufaatasi (Samoa United Methodist) i le taimi o le umusaga o le Malumalu a le aulotu i Vaitele fou