Ua iai nei se suiga i le tautua a le kamupani lafo tupe faamomoli mai fafo o le Pacificezy Money Transfer i Samoa, e pei ona see ese mai le maota o le Tuutuuileloloto lea sa faaigoa muamua o le Feiloaimauso, ae ua iai nei i le nofoaga fou i le maota o le ChanMow Apartments and Mall i Saleufi.
O lea maota fou o loo i tua ane o le nofoaga sa iai le faleoloa tuai o Amau.
O le afiafi o le Aso Sa, 1 o Aukuso 2010 na faapaia ai e le afioga Patele Ioane Anetelea le ofisa fou, lea sa auai uo ma aiga o le pulega o le kamupani.
Faaalia e le tofa Faimalo Allan Stowers, le pule o le Pacificezy Money, ua iai ma suiga fou o le latou tautua e pei o le pu‘e o le ata o le tagata e ana le seleni e lafo mai fafo, ona teu lea i masini komepiuta e faaaogā e iloa ai le tagata lea pe a toe lafo mai se isi ana seleni i le kamupani ma le tau avatu o le tusifolau poo se ID e faamaonia ai.
O se faiga e fesoasoani tele ai i nai tamā ma tina matutua e lafo mai seleni i fanau ma aiga i Niu Sila.
O se isi suiga fou o le faia lea o se password e lē mafai ai ona tala sese e se isi tagata le tupe a se isi, aemaise lava i tagata e umia se suafa matai. Se ta‘ua e Faimalo e mafai ona foia ai le tele o faafitauli e tutupu i seleni e lafo mai fafo, ae tala fua e le isi tagata e ui na te iloa lava e lē o sana seleni.
E tele faafitauli faapea o loo aafia ai foi le tautua a isi pisinisi lafo tupe o loo i Samoa ae e mautinoa o le Pacificezy Money Transfer le uluai pisinisi lafo tupe ua na faia se auaunaga fou e taofia ai ia faafitauli, aemaise o le ata o le a pueina ma teu i le komepiuta.
O le pisinisi a le faletua o Avau ma lona toalua o Mateo i Salelologa ua faamautu i ai le tautua a le Pacificezy Money i le motu i Savaii ma o le a tutusa lelei foi le auaunaga i Upolu ma Salafai, ma o lona uiga o le a tutusa motu e lua i le auaunaga fou.
O le maota o le Tuutuuileloloto o loo faafoe ai pea i le nofoaga tuai se isi pisinisin fou talatupe faamomoli ua faaigoaina o le Pacific Hope o loo pulea e le afioga Silafau Paul Meredith ma le faletua o Salote.
