E silia ma le 300 alii ma tamaitai o loo faaulu i ai vaega o tausi soifua i maota gasegase i atunuu e 12 o le Pasefika (South Pacific Nurses Forum – SPNF), na usuia sa latou fonotaga mo aso e 4 i Aukilani (Novema 8 – 11).
E tai lua tausaga ma usuia lenei fonotaga, ma o le lona 15 lea o fonotaga na faia i le vaiaso talu ai. Mo Niu Sila, o lea faato‘ā toe usuia mai lea i Aotearoa se fono faapea, talu mai le tausaga e 1992.
O le uluai aso, Aso Gafua, na tatala i saunoaga mai le peresitene o le Fono Faavaomalo a Tausi Soifua (International Council of Nurses), le tamaitai o Rosemary Bryant, faapea le faauluuluga fou o tausi soifua i Niu Sila, o Jane O’Malley.
O le fonotaga sa faatautaia ona mataupu uma i le gagana Peretania, i le ‘au‘au: “Nurses at the helm: Steering health across the Pacific”.
O se ‘au‘au ua momoli mai ai le feau tautele, e tāua le galuega o loo faatino e alii ma tamaitai tausi soifua, auā o o latou aao laveai o loo faalagolago atu i ai le soifua maloloina o tagata uma o le Pasefika.
E tele vaega eseese o le auaunaga tau tausi soifua maloloina sa talanoaina. E amata mai lava i matafaioi a i latou o loo avea ma ta‘ita‘i, faasolo mai ē o loo faatautaia a‘oa‘o a tausi soifua, seia oo mai ia i latou o loo faatinoina tonu tiute o ni tausi soifua.
Aemaise foi o luitau o le galuega, ma ni auala e faaaupegaina atili ai alii ma tamaitai tausi soifua mo le faatinoga o o latou tiute.
Aso Muamua (Novema 8)
Sa tauai atu le fonotaga i nisi o mataupu na lāgā mai e sui usufono mai le motu o Fiti, e pei ona folasia mai le tautala a le Failautusi Aoao a le Asosi o Tausi Soifua a Fiti, o Kuini Lutua.
O nisi o faafitauli na ta‘ua e Kuini e iai le faaitiitia o i latou o loo galulue i lenei matata i le atunuu ona ua tele ina o ese atu tausi soifua i nisi atunuu, talu ai le faaletonu o aiaiga o galuega i Fiti.
O le faaletonu pea o loo iai le faiga malo a Fiti, ua faaletonu ai foi ma le tulaga o galuega, e pei ona suia le tulafono o tausaga e malolo litaea ai, o le leai o ni aiaiga mo le saogalemu i galuega, ma le lē mafai ona toe galulue ovataimi alii ma tamaitai tausi soifua.
Aso Lua (Novema 9)
Na talanoaina se tasi o luitau o loo avea ma papupuni i nisi o tausi soifua mai atunuu o le Pasefika e fia ulufale mai mo ni galuega i Niu Sila, o le gagana Peretania.
E taofi eseese nisi o le au usufono i lenei mataupu, ona i Niu Sila lava ia e iai le ausiaga e moomia ona agavaa ai i latou uma o loo i lenei galuega, e pei ona iai se suega e tatau ona pasi, le International English Language System – IELTS.
Peitai e manatu nisi sui usufono, o loo a‘oa‘oina uma lava tausi soifua i o latou atunuu i le gagana Peretania ma malamalama ai, e ui e ese mai le faatulagaina e le soifua maloloina a Niu Sila o lea vaega. E foliga e faatalanoaina pea lenei mataupu i nisi fonotaga.
Sa talanoaina foi le isi luitau i le galuega i atumotu mo le Pasefika, ona o le toatele o a latou tausi soifua ua autovaa mai i Niu Sila ma Ausetalia.
E manatu nisi ua gaoi mai e nei atunuu a latou tausi soifua, ae talitonu foi nisi, e tāua lea vaega mo le faalauteleina atili o tomai o na tausi soifua.
Aso Tolu (Novema 10)
Sa matele talanoaga o lea aso i le galuega laveai a le fesoasoasni tele a tausi soifua na faatino mo Samoa a o feagai ai ma ona mafatiaga i le sunami o le tausaga talu ai.
Na faatāua ai i lea aso i se sauniga faapitoa, tausi soifua uma e to‘a 36 mai Niu Sila na faataulaga o latou taimi ma tupe, a o taliu atu i le atunuu e ofoina la latou tautua.
O le tulai mai o lea faalavelave i Samoa, sa toe talanoa atili ai i le fonotaga le tāua o le auaunaga nofosauni a alii ma tamaitai tausi soifua. O le faatāuaina o le auaunaga a nei tausi soifua, na lagiina ai foi se pese faapitoa e manatua ai la latou auaunaga.
Aso Fa (Novema 11)
Na faalauiloa ai le filifilia o le faauluuluga fou o tausi soifua i Niu Sila, o Jane O’Malley, e avea ma taitaifono o le South Pacific Chief Nursing and Midwifery Officers’ Alliance.
O lenei faalapotopotoga sa iai faatasi lava i le fonotaga a Tausi Soifua o le Pasefika i le vaiaso talu ai. Sa talanoaina le tāua o le galulue faatasi o nei faalapotopotoga e lua, o se vaega na matuā faamamafa i le saunoaga a le faaauluuluga fou o le asosi o tausi soifua i Niu Sila.
Na sosoo ai ma le talanoaina faatasi e nei vaega e lua mataupu eseese i le faatinoga o galuega, o mataupu tau tupe, ma isi vaega uma o le soifuaga masani, o loo tele ina lapelapea ai le auaunaga a tausi soifua ma fomai i le Pasefika.
Na faaiuina le fono i feofoofoaiga a le au usufono, ma vaaia ai foi loimata a o faamavae ma faatofa i uso ma tuagane i le galuega.
