E ui ina loulouā le tau ma toulu timuga, tatafe alavai ma nisi o nofoaga sa afatia i lologa, ae maeu le agalelei o le Atua poto e toatasi ma lona alofa lē faatuaoia, ina ua lupepe le taumanu ma a‘e manuia faiva o tautai.
E malama a‘e le taeao o le Aso Tofi 26 o Ianuari 2012 ae suluia atumauga o Logan City i ave malolosi o le la, ma mafai ai ona maua se laolao e faataunuu ai le faamoemoe sa taumate faalou lē magā pe a tua ma ni ā.
Na tatala aloaia le fonotaga faaletausaga a le Mafutaga a le Leo o tagata Samoa (Voice of the Samoan People i Logan City) i le saunoaga faafetai a le Peresitene, afioga ia Faimalotoa Ioane Pale e faafeiloai ai le mamalu o le atunuu pe tusa ma le 90 sa auai ina ua tō i tua la‘i o Puava e aunoa ma se peau e laga vale i lea aso taupoina (47 Ellen St. Woodridge).
Na ia faafeiloai faapitoa sui lesitala fou aemaise le Afioga i le fai palota sili o John Wick mai le Iunivesite o Griffith.
Na momoli laau i fogaa e ala i se sauniga lotu puupuu sa saunoa i ai le susuga ia Rev Isamaeli Liaina o le faafeagaiga a le ekalesia EFKS i Springwood, na faatagisia ai le Agaga Paia e taiau i polokalame uma.
Na sosoo ai ma le tolaulauina o ripoti a le Peresitene, teutupe ma le failautusi ma na pasia uma lipoti o le 2011.
Sa ave le avanoa i sui taitasi o le laulau e sausaunoa ai foi e tusa ai ma galuega tauave o le 2011. Na laga faatau Tuisamau ia Fata Peteli e fai ma sui o le aofia e faafetaia ai foi le laulau e tusa ai ma le uliina o le Sa o le Leo o tagata Samoa, ona alo lea mo le sailiga tofi o le 2012.
Na filifilia le susuga i le faafeagaiga ia Isamaeli Liaina faapea Ranandy Stanley ma Lonetona Tietie e fesoasoani ia John Wick mo le faatautaia o le Palota mo le sailiga o le ofisa fou auā le taitaina o le mafutaga mo le tausaga 2012.
I le mae‘a ai o fefulisaiga o finagalo ma lagona, ma toe filifilia nei le afioga ia Faimalotoa Ioane Pale e avea ma Peresitene, o le susuga ia Faamatuaina Vaaaoao Alofipo o le failautusi, Lemalu Tautalasoo o le teutupe.
O le fā ai nei o tausaga talu ona tulai mai i latou e tauaveina nei tofiga.
O le afioga ia Sala Tito ua see mai nei i le tofi sui peresitene ae sa galue o le sui failautusi i tausaga e tolu ua mavae.
O le lua ai nei o paeaiga talu ona tulai mai le fetalaiga ia Leautuliilagi Sogialofa Vaa Leapai e avea ma Sooupu, faapea foi Robert Savelio Aiono ma taitai o le autalavou.
O se taimi muamua lenei ua vaaia ai se tamaitai i totonu o le laulauafono a le mafutaga ina ua filifilia Ranandy Stanley e avea ma sui failautusi.
Na alo le mafutaga mo le taumafataga māmā ma faagasolo ai le maimoaina o le ata “TULAFALE” ma isi DVD e faanofofilemu ai evaevaega o le Aso Malolo o Ausetalia, a o le fanau i taaloga, e faatali ai le augasese mo le taumafataga mamafa. Saunoa faafetai le peresitene e tusa ai ma le faatuatuaga a le mafutaga ua toefilifilia ai i latou.
Na avea le fetalaiga ia Samoata e talifaitau ma faamanuia ai le laulau fou faatasi ai ma fuafuaga o le aso.
Na fai le fetalaiga ia Leautuliilagi ma sui o le laulau e toe talifaitau i saunoaga ma faamanuiaga mo galuega ma tiute o le a feagai ai.
O se upu apoapoai mulimuli na saunoa i ai le susuga i le faafeagaiga o Faafetai Setefano ma toe toe faafetaia ai le Atua e ala i se tatalo.
Na molimauina le fiafia o sui lesitala uma ma nai toe ulutaia o le atunuu i le matagofie o lea aso aemaise foi o le agavaa o le laulauafono fou.
Manuia tele faiva alofilima o lenei tausaga i lau afioga i le Peresitene ma le ofisa mamalu o le ofisa ma le Mafutaga a le Leo o Tagata Samoa i Logan City.
