O le Aso Sa aso 2 o Setema na amata ai ona lesitalaina le auusufono i le maota Samoa fou o le Papaigalagala. O se maota ua sili ona matagofie lona fausaga nai lo le maota sa iai muamua.
Na ta‘ua e le Tapa‘au (Chancellor) le afioga ia Fuiolemalama Dr Asofou Soo, e 2 .4 miliona tala le tau. Ua tele suiga fou ua faaopoopo i ai le umukuka ma ona totoga uma auā le tausia o malo ma fonotaga i le maota. Ua sui ai foi le maimoa a i latou na malaga atu mo le fonotaga a le Measina.
O le manulauti o lea fonotaga: “Ua e pale, ua e ‘ula, ua e titi i lou faasinomaga, ae faapefea ona e mātaitū ne‘i lofia i peau laga o le taifana‘e?”
O le Aso Gafua na amataina ai le fonotaga i le ‘ava o le feiloaiga ma faagasolo ai le polokalame i le sauniga lotu na taitaia e le afioga i le Taitaifono aoao o le EFKS o le susuga ia Tauti‘aga Naseri.
Na tatala aloaia le fonotaga e le afioga i le Palemia le susuga ia Tuilaepa Sailele Malielegaoi i lana saunoaga ona amata loa lea i le saunoaga na aami, o le malelega lea a le Ao o le Malo Afioga ia Tupua Tuiatua Tufuga Tupuola Tamasese. O se malelega na logo i tino le ‘anoa ma le o‘oo‘o o le loloto o le gagana o loo momoli mai ai. O lana saunoaga na faapitoa lava i suafa matai, ona sa vaevaeina mataupu o le fonotaga i vaega e tolu: Suafa matai, Gagana Samoa ma le Eleele.
O le Aso Lua na tatala ai i le saunoaga a le Afioga ia Aiono Fanaafi Le Tagaloa le Atamai o Alii le mataupu tau gagana Samoa, ona faasolo ai foi lea o Tootoo na faasoa i itu tau gagana, ae o le Aso Lulu na saunoa ai le Afioga ia Masinalupe Tusipa Masinalupe le Pule o faamasinoga o Fanua ma Suafa, i mataupu tau faamasinoga o fanua ma suafa. Na faapea foi ona manino le tele o fesili na fesiligia ai Masinalupe e tusa o lana foi matafaioi o itu faalefaamasinoga o ia vaega o measina a Samoa.
Na faaiuina le fonotaga matagofie ina ua ta‘ape le gogo ua tofu ma si ana i‘a i faasoaga a le ‘au fomai o le tofa manino ma i latou na tofu faasoa i mataupu ia e tolu ua fai ma poutu o le fonotaga o Measina i lenei tausaga.
Na saunoa le afioga ia Leasiolagi Mālama Meleisea le Tulamalae o le Laumua o suesuega o mataupu tau Samoa i le aotelega o le fonotaga ma faafetaia le ‘aufaipepa ma Tootoo o le fono mai le aso muamua seia oo mai i le si‘ui o le fonotaga.
O le faaiuga o le fonotaga na saunoa foi le Tapaau le afioga ia Fuiolemalama Soo e faapea o le 2014 e toe usuia ai le fonotaga lava lea o Measina ona e tailua tausaga ma fai. O le tausaga la e 2014 o le a faia ai i le gagana faavaomalo (Gagana Peretania) ona ia paleni gagana faaaogāina mo le silafia foi o le atunuu e soifua i fafo.
E manaia foi ae vave ona faasalalau mai mataupu o le a faaautu i ai le fono lea auā foi tapenaga a le aufaipepa mo le isi lua tausaga o lumanai. E faasilasila atu o ata uma o lenei fonotaga o le a faataunuu i le taimi e 40 ai itulau o le tatou nusipepa. O lona uiga o le vaiaso atu i ona tua.
