Fonotaga a le ‘Kumi Fanua’ – Taofia o Sauaga

O le Aso Faraile 24 Iulai na usuia ai le fonotaga mulimuli a le itu Pasefika ua faaigoaina o le Kumi Fanua i lalo o le faamalu a le faalapotopotoga a le SAFVPN (South Auckland Family Violence Project) i Counties Manukau, poo Aukilani i Saute. O le susuga i le alii loia o Ronji Tanielu le fofoga o le aso.
O le auga o lenei fonotaga ina ia faatupulaia le malamalama ma fesootaiga a faalapotopotoga uma i Counties Manukau aua fesoasoani e taofia ai sauaga i totonu o aiga. I saunoaga faapitoa mo lea aso, sa iai le Afioga ia Aliimuamua Sandra Alofivae, tamaitai loia, ma se tasi o Komesina o Aiga (Families Commissioner) i totonu o Niu Sila, na ia taua ai e le se galuega faigofie aua o suiga i amioga saua, e umi se taimi o tau faamasani i suiga fou e sili atu ona lelei aua le saogalemu o o tatou aiga. Ae o le tagata lava ia na te filifili pe sui pe leai, pe a alofa moni i lona aiga ina ia ola maloloina, saogalemu, aua se lumanai manuia o aiga i Aotearoa nei. Na ia taua faamaumauga i le tausaga 2008 e 12,510 valaau i le Matagaluega a Leoleo i Counties Manukau. Mai lea fuainumera o le 31% o tagata Pasefika, pito atu i tagata Maori e 36.1%. O se fuainumera maualuga lea mo tagata Pasefika pe a fuafua atu i le pasene o i tatou i Niu Sila nei.
Ma ua tatau ona tatou faaauau pea lo tatou galulue faatasi ina ia taofia sauaga ua aafia ai o tatou aiga. I le saunoaga a le susuga i le tamaitai fomai Dr Teuila Percival, sa ia taua ai le faanoanoa i le aafiaga o fanau i nei sauaga ua faatupulaia, ma o loo vaaia pea lea i fanau o loo oo atu ma togafitia i le falemai. O nisi o nei aafiaga ua maliliu ai nisi tamaiti, o nisi ua aafia faiai ma tauaso ai, ivi mata ma isi lava aafiaga, poo ua aafia ai foi lo latou ola maloloina mo le olaga atoa.
Sa mataina skits poo tala faatino a le FLEP (Family Life Education Programme) i le taitaiina a le Susuga ia Willie Pua, lea na faatino ai e le autalavou nisi o faiga masani i totonu o aiga, ua faamasania ae o loo sauaina ai le fanau i o latou mafaufau poo latou tino foi. Sa tuufaatasia i le faaiuga o le aso nisi o aoaoga ma mafaufauga mai faalapotopotoga eseese aua le faatinoina o le faaleleia atili o polokalame ma fesoasoani mo tagata Pasefika i Counties Manukau. E silia ma le 100 i latou mai faalapotopotoga eseese, aoga maualuluga, matagaluega a le Malo, sui o le Ministry of Pacific Island Affairs, le tamaitai ia Yolande Ah Chong o le Radio 531PI sa auai i lea aso.
O le susuga i le alii loia ia Henry Herman (Brookfields Law, Manukau) o le taitaifono o le Kumi Fanua, faapea ma le komiti lagolago, o nisi o i latou o loo galulue i le faatinoga o polokalame a le Faamasinoga/Leoleo, Work & Income, faapea le Salvation Army, e iai Diana Vao, Geoff Fuiavalilii, Fia Turner ma Leva Aati-Schuster. Valaau le telefoni 278-9266 pe afai ua e manaomia se fesoasoani ona o sauaga i totonu o lou aiga, poo se polokalame faatulagaina mo lau ekalesia, poo se faalapotopotoga poo mafutaga foi a aiga.