Ua au tausagā o taumafai le fesootaiga faatusitala ma mataupu o le Siosiomaga ae e foliga mai i le manatu o i latou e fitoi tonu i ai galuega o puipuiga ma le faasao o le siosiomaga e lē o atoatoa lava ona momoli le tele o a latou polokalame ma taumafaiga i luga o nusipepa, leitio ma televise. Ma o le vaiaso lenei ua faatautaia ai foi se isi fono i le va lea o tusitala o le Pasefika ma le ofisa o le siosiomaga o le Pasefika le SPREP ina ia toe auiliili lelei mafuaaga e lē o sao lelei atu ai faamaumauga ma faamatalaga mai i lea ofisa i tagata lautele o Samoa atoa ai ona motu tuaoi.
O le tali na ave e le toatele o tusitala i Samoa lava ia i se latou fonotaga ma le ofisa o Malo Aufaatasi i se taumafaiga faapea i le amataga o le tausaga, o mataupu o le siosiomaga e faa lē fiafia le toatele e faitau i ai, e lē o ni tala foi e ave i luma o se pepa pe taimua ai ni polokalame tau televise ma leitio, se‘i vaganā ua oo i tulaga faigata o suiga o le tau e pei o tsunami ma afā fulifao. Seiloga ua maliliu ai nisi ona mafai lea ona vaaia le amata ai o se lomiga poo ni faasalalauga.
O le mafuaaga na ta‘ua e le toatele o le faigata ia o upu o le siosiomaga ma e tatau ona lava saunia, lava le malamalama o le tusitala i upu e fesootai ma soo se vaega o le siosiomaga ona mafai loa lea ona faafaigofie ona faamatala ma ofigofie ai galuega o puipuiga i le atunuu.
O finagalo foi la ia ua laualuga ai le fono faaleaoaoga lea ua faatautaia i Vailima ma ua faatupe foi i se fesoasoani a le Malo o Ausetalia.
O le isi la laasaga fou ua vaaia i le fono lenei ua valaaulia ai sui o nusipepa ma televise faapea leitio o le Pasefika, o le saofafai lelei lava ma saienitisi ma tagata suesue o loo galulue i le Ofisa o le SPREP ma faamalamalama uiga o upu nei e fenumiai ma lē malamalama ai tusitala auā o le auga o le galuega, a malamalama ma manino tusitala o le a faigofie foi ona malamalama le lautele o le atunuu. O le vaiaso atoa lea e faagasolo ai le feiloaiga tāua lenei ma o le a faapea foi ona asia nisi o ofisa faasalalau ma nusipepa i Samoa ina ia saga faalauaitele ai le galuega lea e faia i aso uma o le unai o faalauiloa o puipuiga ma le faasao o le siosiomaga.
Mo nisi o tusitala ua manino lava o le faaaogāina o le gagana faigofie aemaise o le Gagana muamua a le atunuu lava latou, o le a telē se suiga o le a vaaia ai ma o se faamoemoe lenei ua faaalia e le Ofisa o le SPREP o le a unai i lenei fonotaga faaleaoaoga ua faia i Apia.
O le Hai Komesina o le Malo o Ausetalia i Samoa, o Dr Stephen Henningham na tatalaina aloaia lenei fonotaga faaleaoaoga i lenei vaiaso ma lana tatalo, ia iai se suiga o auala e tusia ma lipotia ai faalalavelave faalenatura ma taumafaiga e puipuia ai le siosiomaga pe a mae‘a lenei mafutaga tāua.
