Fono ma faamavae le Palemene i le maota fono i Tiafau

O le vaiaso nei e faamavae atu ai le Palemene o Samoa i le maota fono i Tiafau a o lei talaina atoa i lalo ae fausia se maota fono fou, o le a faatupe i se fesoasoani a le Malo o Ausetalia ae lagolago i ai ma le Malo o Samoa.

O le lē saogalemu o le maota o loo iai nei o le pogai lea o le galuega. O se alii pisikoa Amerika na ia tusia le ata o le maota fono ma faapea ona fausia ai i le vaitau o le 1970. O se galuega na umusa i se taimi o lea vaitau ae sa tumau pea vaaiga o le maota fono tuai lea sa lumafale i ai le maota fou.

Peitai o nai tausaga e lei mamao atu a o loma le atoaga o le limasefulu tausaga o le Malo Tutoatasi o Samoa na faailoga ia Iuni o le tausaga e 2012, na tuu ai i lalo ona ua pala nisi o vaega ma ua lē saogalemu mo se tasi o ofisa o le Malo sa faaaogāina le Matagaluega o Faamasinoga, lea sa faafoe ai nisi o faamasinoga o fanua ma suafa.

Sa tele ni finagalo tetee sa faaalia i le faaiuga e tuu i lalo ona sa iai le fuafuaga a le Fofoga Fetalai o loo iai nei e toe faafou ae avea ma maota o mataaga e teu ai faamaumauga a le Palemene ma fai foi ma vaaiga mo tupulaga o le lumanai. Sa iai le fuafuaga e saili se fesoasoani e toe fausia atoa ai le maota i lona vaaiga tuai sa iai, peitai e lei toe maua mai se faamatalaga poo fea ua agai i ai lea fuafuaga.

O le Aso Faraile nei le aso 14 o Aukuso 2015 o se sauniga faapitoa a le Palemene o Samoa, i le maota fono o iai nei, a o lei amatalia galuega o le maota fono fou.

O le vaiaso nei foi ua toe foi ai fonotaga a le Palemene i le maota i Tiafau mai le maota fono o Tupua Tamasese Efi i Sogi poo le convention center lea sa see i ai galuega a le fono aoao, ona ua lē saogalemu le maota fono o le a tala i lalo.

O galuega a le Palemene mulimuli i le maota fono i Tiafau a o lei fausia le maota fou o loo faatulaga ai e fitu ni tulafono taufaaofi o le a faataatia ai. O se tasi o tulafono taufaaofi o le teuteuga o le Tulafono o Faigapalota o le a talanoaina e sui Mamalu o le Fono Aoao Faitulafono i se tulaga faanatinati.

Ua iai le talitonuga o ia teuteuga e fesootai ma le teuteuga o le Faavae ua faatuina ai itumalo faapalota mo itumalo tu taulaga o Faleata ma le Vaimauga, faapea foi ma le aveesea o nofoa tailua o nisi o itumalo faafaipule.

O se faiga o le a vaelua ai nei itumalo ma filifilia mai i le palota tele i le tausaga fou se faipule e toatasi. E mataina foi lea suiga auā afai o faipule e toalua o loo iai nei o loo i le HRPP e oo atu i le palota o le tausaga fou 2016, ua tauva le isi i le tasi mo le maua o le avanoa e tasi e avea ai ma faipule.

Le maota fono o le a tala i lalo ae fausia se maota fono fou o le Palemene o Samoa Se vaaiga i totonu o le maota fono i Tiafau i taimi o fonotaga a le Palemene