O le lipoti a le Suetusi sili a le Malo o loo tatali i ai le atunuu i le taimi e oo ane ai i le tauaofiaga a le Palemene mo le talanoaina. O le Aso Lua ua mavae na amata ai taualumana a le fono aoao peitai sa amata i nisi o mataupu e pei o le talanoaina o nisi o tulafono taufaaofi ma teuteuga o nisi o tulafono ua mae‘a ona pasia.
O le uluai aso lava o le fono na faatu ai e le Palemia se lafo mo le faaopoopoina o itula e fono ai le Palemene mai le iva i le taeao, malolo i le aoauli ile tasi, ae toe amata i le fitu i le afiafi ae manava i le 11 ile po. O le uumi o taimi fono o faipule e mafua i le tele o mataupu tuua e lei mae‘a ona tagofia e aofia ai le lipoti a le Suetusi sili. Na saunoa ai le Palemia ina ua mae‘a lana lafo faatu ia alu atu le sui ma lona ie palanikeke ona e fai lava si malulu o le ea o le maota fono.
O se tasi o tulafono na talanoaina i lena vaiaso ua mavae o le tulafono faasino i le faatuina o se faamasinoga mo mataupu tau aiga poo se Family Court. O se tasi lea o fuafuaga tāua a le Malo ua faailoa e le Minisita o Faamasinoga le Afioga Fiame Naomi Mataafa, o le iai o se faamasinoga e tagofia ai lava mataupu faaleaiga e faasino i solitulafono e aafia ai ulugalii ma fanau aemaise foi o ni mataupu e faasino i le tuu eseeseina o se ulugalii ua fia tetea auā o le taimi nei o le faamasinoga maualuga o loo fofogaina ma suesueina ai ia ituaiga o mataupu faasino i le lotoifale o se aiga.
E tele finagalo lagolago o faipule i le faatuina o se faamasinoga mo mataupu tau aiga ma ua iai ma a latou fautuaga ua tuuina atu i se komiti faapalemene mo le lauliliuina, ma avanoa ai foi le atunuu lautele e faaali i ai ni o latou finagalo a o lei toe foi ane le tulafono taufaaofi i le maota fono mo le faitauga mulimuli ma pasia ai loa. O se isi tulafono tāua sa soalaupule lava i le vaiaso ua mavae o se tulafono taufaaofi e faatonutonu ai ma lima taitaiina galuega o le tomai tau palama poo le Plumbing. O loo aiaia ai i le tulafono taufaaofi lenei le tatau ona lesitala i latou uma o le a faatinoina lea tomai faapitoa.
Faaalia e le Palemia le susuga Tuilaepa Lupesoliai Sailele Malielegaoi, o se tulafono tāua o le a mafai ai ona faatonutonu lea foi tomai auā e iai lava i latou e faia e lē atoatoa lelei le faatinoga o o latou tiute. O le fuafuaga foi lea a le Malo ia avatu uma tomai faapitoa e faatulafono ina mafai ai e le atunuu ona saili ni fesoasoani faaletulafono pe a iai ni faaletonu e aafia ai. O le tomai faapitoa o tusitala ma le aufaasalalau ua iai foi le fuafuaga e tuuina atu le latou tulafono taufaaofi i se taimi o lenei tausaga ma o le mafai ai ona faatu se itutino poo se fono faatonutonu e vaavaaia le faatinoga poo lea tomai ma avanoa ai le atunuu e saili se fesoasoani i ni faaletonu e aafia ai i le faatinoga o lea foi tomai faapitoa. O le Aso Tofi na tea nei na tolopo ai le fono a le Palemene, ma na toe tauaofia i le Aso Gafua o le vaiaso nei.
