Ua tuuina atu e le Afioga i le alii Palemia, Tuilaepa Sailele Malielegaoi, i luma o le kapeneta lana lipoti e tusa ai o le Fono a Taitai o Malo o le Pasefika ma le Malo o Iapani sa faia i le masina na tea nei i Hokkaido i Iapani.
Ua faaalia i lea lipoti, le faailoa e le Malo o Iapani o se vaega tupe e 50 piliona tupe Iapani (e tusa lea ma le $500 miliona tala Amerika) o le a ofoina mai e lea Malo e fesoasoani ai i atunuu o le Forum, mo le tolu (3) tausaga amata atu i le tausaga nei 2009 e oo i le 2012. O lenei vaega tupe o le a faaaogaina i vaega lautele e ogatasi ma Vaaiga taulai a atumotu o le Forum, e aofia ai:
• Tulaga i le faatupuina o le tamaoaiga,
• Atinae mo le puipuiga o le Siosiomaga,
• Pulega Malo lelei
• Puipuiga o le Saogalemu
• Fesoasoani i le va o tagata e pei ona faaigoaina o le “Kizuna Plan”.
Sa malilie foi atunuu o le Pasefika ma Iapani ina ia faia se taumafaiga tuufaatasi aua le puipui o le siosiomaga, lea ua faaigoaina o le “Pacific Environment Community”. O le faamoemoe, ina ia galulue faatasi Iapani ma atunuu o le Pasefika i ni auala e foia ai faafitauli tau i le siosiomaga.
Ua faamoemoe foi o le a faia se fono faapitoa i le 2010, e iloilo ai le faatinoina o galuega i lalo o le Pacific Environment Community. O le a faia ai se fono mo le faatinoina o polokalame i se taimi lata mai e sauni ai mo lea fono i le 2010.
Ua faaavanoa faapitoa foi e Iapani se vaega tupe e 6.8 piliona tupe Iapani, mo galuega fesoasoani i atunuu o le Forum i lalo o taumafaiga a Iapani ua taua o le “Cool Earth Partnership”. O lenei taumafaiga na lagolagoina e Samoa i le tausaga na tea nei.
