Ua viia e le Hai Komesina Ausetalia o Dr Stephen Henningham, le lagolago pea o le Malo o Samoa le Matagaluega o Leoleo ma Falepuipui, i le Minisita ma le alii Komesina i le faaauau pea o le polokalame a lona Malo o le puipuiga poo le defense e pei ona aumai ai le vaaleoleo o le Nafanua e faatino ai le puipuia o ogasami faatulafonoina o Samoa ma faatino foi galuega laveai i taimi o faalavelave faalenatura ma faalavelave faafuasei.
O le polokalame o le puipuiga a lea Malo e ala i vaaleoleo e 24 na fausia, lea na faameaalofa atu i atunuu o le Pasefika e aofia ai ma Samoa.
O se tasi lea o fuafuaga a Ausetalia na matuā lūgā lālō ai finagalo o taitai o le Malo o Samoa i le vaitau o le faigamalo soofaatasi a le afioga i le Palemia o Vaai Kolone ma Itu agai sa taitaia e le afioga Tofilau Eti Alesana.
Sa ilitata lava i lea vaitaimi i le taugata o le faatupega o le vaaleoleo pe a oo ina umia e le malo o Samoa auā e lē taugofie suauu e utu ai, faapea ma le vaaiga o le vaa i ona afi ma isi totoga.
Peitai na talia lava e le Malo o Samoa le fuafuaga a Ausetalia ma taunuu ai lava ona aumai le vaaleoleo ua faaigoa o le MV Nafanua.
O le aumai o le fesoasoani ua faaauau ai pea ona aapa mai lima agalelei o lea Malo e faatupe nisi o vaega o le faaaogāina o le vaa, ae o se isi vaega tele o loo faatupe lava e le Malo o Samoa e ala i le Matagaluega o leoleo ma falepuipui.
O le Aso Faraile na tea nei na folau atu ai le Nafanua ma le faamoemoe o le pulega o le vaega o loo faagaioia le vaa le Police Maritime Wing o lona ofisa tutotonu o loo i luga o le uafu tele i Matautu, o le a siitia atili le faatinoga o a latou tiute mo galuega i luga o le sami pe a mae‘a mai ona faaleleia le vaa.
O le auvaa atoa o Malu o le Malo mai lava i le kapeteni. O le saunoaga a le Komesina o leoleo na ia faafetaia ai le Malo o Ausetalia ona e lē o solomuli lava e ofoina mai fesoasoani mo le Nafanua e lē gata o le faaleleia o le vaa ae faapea foi aoaoga o loo faaauau mo sui o le auvaa ma le aufaigaluega atoa.
O le a toe taliu i Samoa le Nafanua e latalata i le faaiuga o le tausaga nei pe a mae‘a ona galuega toe faaleleia.
Tatou talosia le tuua ai o aiga, nuu ma le atunuu e le auvaa ma tatou tatalo ia faalaolao e le Atua le vasaloloa a o agai atu mo Cairns i Ausetalia, faapea foi ma le toe taliu i le atunuu pele.
