“Ua tatau ona lē toe faatauina se avamalosi i faleoloa i totonu o nuu ma afioaga”
Ua tele faalavelave ua tutupu i Samoa e mafua i le avamalosi. Ua tele foi solitulafono ua tutupu ma aliali mai ona o le avamalosi. O se pisinisi lelei tele le gaosiga o le avamalosi ona o tupe e maua ai, lea foi e masaa atu se vaega o ia seleni maua i lenei oloa gaosi i le Malo e ala i lafoga totogi.
E ui ina iai itu lelei ma itu lē lelei o le avamalosi ae o le auai o sui o nuu ma tagata lautele i le fono sa taloina e le ofisa o le Komisi mo le Toe Fuataina o Tulafono le Samoa Law Reform Commission e talanoaina ai le tulafono o le avamalosi, sa lagona ai le mamafa o finagalo i le tatau ona fai ni suiga i le gaosiga ma le faatauina faapea le faaaogāina e tagata o le avamalosi.
“Ua tatau ona lē toe faatauina se avamalosi i faleoloa o loo i nuu ma afioaga”, o se tasi le o finagalo na folasia i lea mafutaga. O nai masina e lei mamao tele atu sa laga ai ni finagalo faaalia i le matautia o le malosi o le alcohol poo le avamalosi o loo i totonu o fagu malosi o loo gaosia i Samoa.
Fai mai nisi o ia manatu, e na ona faailoa mai o le numera o le malosi o le avamalosi i pepa o loo faailoa ai fagu malosi ae o totonu e sili atu. O le lagona o i latou ua tatau ona suesueina lelei le gaosiga o ia oloa tau avamalosi.
Faaalia e le tamaitai Pule Sili o le ofisa o le komisi mo le toe fuataina o tulafono le afioga Leota Terisa Potoi, o le iloiloga o le tulafono o loo feagai ma le komisi i le taimi nei, o loo mafua i se talosaga mai le Malo i lo latou ofisa.
“O le tulaga foi lena o loo matou taloina ai le atunuu e auai i feiloaiga faalauaitele ma le ofisa e sasaa mai ai ni o latou lagona poo ā nisi suiga ua tatau ma talafeagai mo le tulafono”.
Na saunoa mai foi le Pule sili e lē mafai ona faatinoina e lo latou ofisa se lipoti ma ni fautuaga e ave i le kapeneta pe a lē atoatoa le latou pitolaau i le talanoa i le atunuu e aofia ai sui o nuu ma afioaga, ekalesia ma faalapotopotoga tumaoti aemaise o kamupani ma pisinisi.
O le fono faalauaitele sa usuia mo Upolu i le vaiaso ua mavae na faalogoina ai lagona autasi ua tatau ona faia ni suiga i le tulafono ona o le tele o faalavelave ma solitulafono ua aliali mai ona o le avamalosi.
Ua manao nisi e sii faasalaga o solitulafono e mafua i le avamalosi, mananao foi nisi e siitia le tausaga e mafai ai ona tagofia le avamalosi e tupulaga mai le 21 i le 25. O nisi foi ua latou finauina le tatau ona tapu pe faasā ona toe faatauina ni avamalosi i soo se faleoloa i nuu ma afioaga.
O le tausaga fou e oo ai i le Kapeneta se lipoti ma ni fautuaga a le komisi mo le toe fuataina o tulafono ona faatoa iloa ai lea o ni suiga o le a faia.
