Ua folafola nei e le Tautua Samoa party, a tulai mai i le faatautaiga o le Malo i le mae‘a o le palota i le aso 4 o Mati 2011, o le a faatino lona vaega muamua ua ave i ai le faamuamua a le latou faigamalo, ma e faatino uma i totonu o le 3 masina o le latou nofoaiga.
“O le a faatapulaa le tofiga palemia i le na o le 2 paeaiga e tauave ai e se tasi lea tofi maualuga, faapa‘ū le tau o taumafa mai fafo e ala i le aveesea o le lafoga o le VAGST, ma siitia le totogi o Pulenuu ma Sui o le Malo”.
O le saunoaga lea a le ta‘ita‘i, le afioga Vaai Papu Vaai i se feiloaiga ma tusitala. Na ia faailoa foi o le a liliu le Tautua Samoa e siitia le penisione mo tagata matutua ma o le a faalua foi ona tala i totonu o le masina.
“Afai e $125 le penisione lea e maua i le masina i le taimi nei, o lona uiga a matou tulai mai o le a faaluaina”.
O lona uiga i le finagalo o le ta‘ita‘i o lea vaega faaupufai o le a maua le $250 tala i le masina ma o le tala e ta‘i $125 tala i le lua vaiaso.
O se siitaga ua faaalia e le tamā matua o Sione Masuisui, o se faamanuiaga lea ua leva ona tatau ona faatino, ae talosia ia manuia le faamoemoe o le Tautua Samoa ma tino ai le latou folafolaga ua faailoa nei.
O le faamoemoe o le afioga Vaai Papu ma le vaega faaupufai, ia mafai ona maua se faamāmā avega e ala i le penisione auā na ia ta‘ua o tupe ia o loo fai ai isi fuafuaga a aiga.
E lē o iai se fuafuaga a le Tautua Samoa e siitia le lafoga o le VAGST e pei ona saunoa Vaai, peitai o le tasi lea o vaega tāua o loo faalagolago nei i ai le Malo mo le maua ai o ni seleni faaopoopo mo le faia o galuega.
“O le a matou silasila i ai ma e lē o le taimi lenei e fai atu ai se manatu i lena mataupu”.
O loo faamoemoe lea vaega faaupufai o le aso 14 o le masina nei o Fepuari o le a faalauiloa ai le latou anavatau poo le manifeso, lea o le a saga faalauiloa ai a latou fuafuaga faataoto e lima ta‘ita‘ina ai le latou faigamalo mo le isi lima tausaga.
O le fesili a le tusitala pe faamata o le a faaitiitia e lea vaega faaupufai le taimi o nofoaiga a sui o le Palemene mai le 5 o tausaga o iai nei, i le 4 e pei ona folafola e le SDUP i le palota o le 2006.
“E leai o loo manaia lava le lima tausaga o iai nei”. O le finagalo lea o le ta‘ita‘i.
O le tofiga Palemia na saunoa Vaai, tasi lea tulaga o le a silasila i ai, mo le faia o ni teuteuga e suia ai le tuusaoloto o le taimi o se Palemia i le faamuta i le na o le 2 paeaiga faapalemene.
O lona uiga e na o le 10 tausaga. “E leaga tele le mea ua iai nei, ua umi ma tele tausaga ma ua mafua ai ona soonafai le pule ma tulai mai ai nisi mafatiaga e fetaiai ma tagata”, o le finagalo o Vaai Papu.
