Ua folafola e le taitai o le HRPP le afioga i le Palemia, e manumalo uma mai sui tauva o lana vaega faaupufai i itumalo o le a tauva ai ma sui o le Tautua Samoa. O le finagalo o Tuilaepa, e faigata ona iloa le faaiuga o le palota tele, ae o palota laiti e faigofie auā ua tu le Malo ina ua mae‘a le palota aoao.
E lē o faatafa ai tapenaga a le Tautua Samoa mo ana sui tauva e toatolu, Lealiifano Iopu Tanielu mo Vaisigano Numera Tasi, Asiata Wairaki Toevai mo Satupaitea, ma Alai‘asa Elena mo Anoamaa i Sasae.
O le feiloaiga a taitai o le Tautua Samoa ma nisi o faipule o lea pati faaupufai ma ana sui tauva, na faaalia ai e taitai o lea vaega faaupufai, e loto tetele lava e manuia mai a latou sui.
E leai se sui o lea pati mo le palota laititi a Aleipata Itupa i Luga, ma o le nofoa mautinoa lea o le HRPP auā o sui tauva uma o le a taufetuli mai ai, o loo lagolagoina le itu a le Malo.
I sailiiliga i finagalo faaalia o nisi o tagata palota o itumalo, e 4 o le a toe sailia ni o latou tofi faipule, e atagia mai ai e fai si malolosi o sui tauva o le HRPP i Satupaitea ma Anoamaa i Sasae seia vaganā Vaisigano Numera Tasi, o loo malosi le lagolagoina o le sui tauva o le Tautua Samoa.
E fua lea vaaiga i lagona o nisi o matai sa agai i ai se sailiga a le nusipepa. O loo faavae foi le lagona o nisi o i latou sa fesiligia i faamasinoga o le palota ua soloia ai tofi faipule o ia itumalo aemaise lava le lagona taatele.
E alofagia le sui e faia‘ina i le faamasinoga o le palota pe afai sa iai ni taumafaiga e toe faataatia i tua se tagi ae ua lē mafai ma ua manumalo le ave pea i le tulafono.
O le 49 o nofoa o le Palemene e 36 nofoa na manumalo ai le HRPP ina ua mae‘a le palota tele, ae 13 le Tautua Samoa.
E toatolu sui o le HRPP na faamaonia moliaga o faiga faaalatua i le palota tele ma soloia ai o latou nofoa, e pei o Seuala Tauā Kitiona o Aleipata Itupa i Luga, Alai‘asa Filipo Schwarts Hunt o Anoamaa i Sasa‘e, ma Tavu‘i Tiafau Tafu Salevao o Satupaitea.
E na o le tasi le nofoa o le Tautua Samoa na avanoa ona o iuga o tagi o le palota lea sa manumalo mai ai Vaai Papu Vaelupe o Vaisigano Numera Tasi. O faaiuga o faigapalota laiti o loo loma nei, o le a iloa ai pe toe maua e le HRPP ona nofoa e tolu, faapea le Tautua Samoa i lona nofoa e tasi.
Peitai e ono faaopoopo nofoa o le Itu agai pe afai e manumalo uma ona sui tauva e toatolu ae maua e le HRPP na o le nofoa e tasi le itumalo o Aleipata Itupa i Luga lea e lē o iai se sui tauva o le Tautua Samoa.
O le taimi nei e na o le 33 nofoa o loo umia e le HRPP ae 12 le Tautua Samoa. A manumalo uma le HRPP e maua le nofoa faaopoopo e tasi i le aofaiga e 37 faatusa i le 36 na ia maua i le mae‘a o le palota tele.
Ae afai e suipi uma le Tautua Samoa i nofoa e tolu, ona latou maua lea o nofoa e 15, ma o lona uiga ua faaopoopo nofoa e lua faatusa i le 13 na manumalo ai i le mae‘a o le faiga palota tele a le atunuu i a Mati.
O le a lē maua lava le 17 sa moemiti i ai le Itu Agai latou te maua i le palota tele, auā o se numera e aveesea ai le malosiaga o le lua vaetolu e mafai ai e le HRPP ua toe filifilia e tauaveina le pulea o le Malo, ona faia ni suiga tetele aemaise o le teuteu ai o le Faavae o le atunuu.
