O le amatalia o malaga a le Samoa Airways mai Apia i Brisbane Ausetalia i le Aso Lua o le vaiaso nei, ua valoia ai i lagona faaalia o nisi o loo lotolotoi i le atinae o tagata tafafao i Samoa le siitia maualuga ai o le atinae i se tulaga lelei ma manuia. O lea tulaga e mafua mai i le toatele o tagata aemaise o tulisi e malaga i Samoa e tafafao ai, aemaise o o tatou tagata ua alala ma aumau i Brisbane o le a faigofie fuafuaga o malaga pe a fia asiasi i aiga.
Ua faaalia e le tamaitai taitaifono o le Komiti Faafoe o le Pulega o Tagata Tafafao i Samoa o Adele Kruse, o le alavaa fou o le Samoa Airways e lē tau fesiligia o le a faaopoopoina ai le numera o tagata tafafao e tafafao i Samoa ma tutumu ai potu o faletalimalo. O Adele o le pule faatonu foi o le faletalimalo o le Insel Fehmarn. O le manatu foi lea o le alii pule o le faletalimalo o le Taumeasina Island Resort le afioga Tuiataga Nathan Bucknall. “Ou te talitonu ua leva ona faatalitali le atinae o tulisi i Samoa i se avanoa mo ni malaga i Brisbane a le tatou kamupani vaalele auā e toatele le au tafafao i lena vaega o Ausetalia o loo fia maua se auaunaga tau malaga a vaalele e tuusa’o mai i Samoa”.
O le finagalo o le alii pule o le Samoa Airways le afioga Tupuivao Seiuli Alvin Tuala, na ia faaalia ai i se pepa o faamatalaga o lona mitamitaga lea faatasi ai ma le Komiti Faafoe o le kamupani vaalele ma le pulega ona ua amata le alavaa fou i le atoaga o le tausaga e tasi talu ona toe faatu le kamupani vaalele a Samoa ua suia lona igoa i le Samoa Airways. Ua faaopoopo le alavaa i Brisbane i le alavaa i le va o Apia ma Sini i Ausetalia ma o le a saga tele ai avanoa mo tulisi e afea le atunuu aemaise lava o tatou tagata ina ia faaaogā lo latou lava vaalele e faimalaga ai. O le masina o Novema o le tausaga ua mavae 2017 na toe amata ai le kamupani vaalele a le atunuu ma ua tautino ai ma le Malo e lē toe foi i faaletonu sa feagai ma le Polenisia i aitalafu ma gaugau sa iai le pulea o le Polenisia. Ua tautino ai foi le Palemia o le atunuu e lē toe faia se faaiuga sese o le faipaaga ma se isi kamupani vaalele i fafo e pei ona sa iai le faaipoipoga ma le kamupani vaalele o le Virgin Australia.
Sa tu le vaalele i le Aso Faraile i tua atu a’o tau faaleleia le faitotoa i tua na aafia i le pusa o le loli e la’u ai taumafa mo pasese i luga o le vaalele. Faaalia e Tuilaepa i le feiloaiga ma tusitala, o se faaletonu sa lē tatau ona tupu ae o le faatamala lava e mafua ai ona tutupu ni faaletonu faapea. Ua mae’a ona toe faaleleia le faitotoa ma ua toe fealuai le Samoa Airways 737-800.
