Ua toe faafoi atu e le Ofisa o Leoleo i le Matagaluega o le Soifua Maloloina se suesuega na talosagaina leoleo latou te faatautaia faatatau i se tausi soifua o loo aoga i le taimi lenei na maua ua ia faia ni taotoga ua peritome ai fanau tama laiti e aunoa ma se faatagaga faaletulafono e faia ai.
O lea tausi soifua o se alii talavou ua faapea ona lamalama faaiuiu ana aoaoga ae ua mafai foi ona galue o se tausi soifua a o faamae‘a ai ona tusi pasi i lea tomai faatausisoifua.
O lona uiga o loo mafai ona maua le avanoa e galue ai faataitai o se tausi soifua i lalo o le vaavaaiga a tausi soifua ma fomai o soo se falemai i le atunuu.
O le tulaga lea e iai le tele o tausi soifua o loo aoaoina i lea tautua i totonu o le atunuu. Peitai, o le tausi soifua lea, ua faamaonia e toavalu lelei tama laiti ua ia faia taotoga mo le peritomeina.
O se tomai ua na o le matagaluega o le soifua maloloina ua sau ai le faatagaga i se tasi na te faia pe tausi soifua pe fomai foi.
O lea la na ave ai loa e le Matagaluega o le Soifua Maloloina i le Matagaluega o Leoleo mo ni a latou suesuega peitai o lea ua ta‘ua e le Matagaluega, e lē o iai ma ni molimau e ono faapea mai ai ua soli se tulafono e lenei alii se‘i vaganā ai le itu lea o lea na ia faia nei taotoga ae e lē o iai se laisene poo se faatagaga mai i le Soifua maloloina na te faia ai lea tulaga.
O mātua lava o tamaiti nei na agai ma talosagaina le tausi soifua na te faia ia taotoga ona o le manatu e taugofie atu le fai i tua o ia taotoga nai lo le agai i falemai ma fomai tuma‘oti ia ua matuā taugata lava le tupe e totogi mo le taotoga o le tamaitiiti e toatasi.
O lea na ta‘ua e na o le $7 (fitu tala Samoa) na totogi ai le tausi soifua lea mo nei taotoga.
O le faamatalaga a Su‘a Tiumalu, e i le Matagaluega o le Soifua Maloloina le aiā e faia ai se latou suesuega i le mataupu ma tuu atu faasalaga a le ofisa latou i le latou tagata faigaluega pe afai ua faamaonia lona faia o lea tulaga.
Ae se‘i vaganā ua iai se tagi mai i mātua o le fanau na taooto e leai lava se isi gaioiga e mafai ona faia e Leoleo i lea mataupu ona o le mataupu lea tau i le soifua maloloina lava latou.
E lē o iai se tamaitiiti ua aafia i ia taotoga, o le faamatalaga lea a leoleo ma o iina ua agai ai loa e toe faafoi le mataupu e iloilo ma fai i ai se faaiuga a le matagaluega o le Soifua Maloloina.
Talu ai le siitia o le tau o le taotoga lea ua lata i le $100 tala i le tamaititi e toatasi, e toatele lava mātua ua agai i fomai i tua atu o le lio lea a le matagaluega o le soifua maloloina latou te faatino taotoga nei mo fanau tama.
O le isi tamā sa molia ona e toatasi se tamaitiiti na aafia i taotoga na ia faia na toe faalēaogā foi e le faamasinoga le tagi na faia e mātua o lea tamaititi ia te ia ona o le mau a le faamasinoga o le lē usitai lava o le tamaitiiti i faatonuga o puipuiga na aafia ai ae o le isi toatele na taooto i lea toeaina mai Falealili, e leai se tasi na aafia.
O le amataga o le tausaga lea na faia ai se faasalalauga a le Matagaluega o le Soifua Maloloina e faatatau i nisi ua agai foi i aiga ma nuu e faatino ai taotoga nei ma na lapataia lava le atunuu e logo atu le Matagaluega pe a iloa e lē o iai se laisene o ia tagata e faia ai nei taotoga.
E tele ina totogi i falalilii a lē o lea e laitiiti lava le tupe e faaalu e mātua i nei taotoga ma o le mafuaaga lea o le toatele ua agai lava i fomai faataitai nei mo ia taotoga ae o le popolega o le matagaluega o le aafia ai o le soifua o le fanau mai i nei faiga ae e lē o iai se faatagaga e faatino ai.
