Na tuua Samoa mo Niu Sila e le alii o Lee Apineru i le lua poo le tolu tausaga ua mavae a o galue i le pulega o malaevaalele i le ofisa o tupe.
O ia o se tasi o alii ofisa sinia sa feagai ma le aoina ma teu seleni maua a le pulega mai le totogi o lafoga a tagata malaga poo airport taxes, o tupe o le totogi o le vaega o loo tutū ai taavale faapea isi auaunaga a le Pulega o Malaevaalele.
E malaga ese ma Samoa lea taulealea ua ia silafia le suesuega na faia e le suetusi i tupe a le pulega lea na maua ai ni faaletonu i nisi o tupe ua leiloloa.
O le molimau a le suetusi na faia le suesuega na ia ta‘ua ai, sa fesiligia Lee ma lē sa faauluulu i ai le ofisa o tupe a le pulega o malaevaalele, ma faapea foi le Pule Sili sa iai ma fautuaina ai loa se suesuega faapitoa i seleni ua lē maua poo fea ua agai i ai.
O le vaiaso la ua tuanai sa tulai ai Lee i le faamsinoga maualuga mo le suesueina o ona moliaga e 70 o le gaoi a o avea ma tagata faigaluega poo le Theft as servant e aafia ai se seleni e tusa ma le 50 afe tala tupe Samoa. O le molimau a lē na faia le suesuega, o tupe nei na aafia o seleni a le pulega mai ana auaunaga totogi e pei ona faailoa atu i le amataga o lenei lipoti.
O le mataupu foi lenei sa molia ai ma lē sa faauluulu i ai le vaega o tupe poo le financial controller a le pulega o malaevaalele le afioga Muliagatele Rapi Tevaga, lea na faamaonia ona moliaga o le gaoi a o avea ma tagata faigaluega na aafia ai se vaegatupe e tusa ma le $30,000. O le tausaga e 2012 na faia ai le faaiuga a le faamasinoga ma faasalaina ai i le falepuipui. O lea foi sa vaaia o ia i le faamasinoga o Lee o se molimau.
Ina ua mae‘a le faamasinoga o Muliagatele Rapi Tevaga sa faia sailiga a leoleo pe faapefea ona toe maua Lee mai Niu Sila mo le tali i moliaga faasaga ia te ia.
O lea na faailoa mai e le loia mo le itu a leoleo e lē o iai so latou silafia pe na faapefea ona toe maua lē ua molia, ona e leai se faamaumauga o iloa ai na toe aumai faamalosi o ia mai lea atunuu ona o ona moliaga e fia suesueina e le faamasinoga.
O le vaiaso na tea nei na faaauau ai le faamasinoga lenei ma o loo tālia vaega faaiu ona aumai ai lea o se faaiuga.
