Ua tele tala ma faitioga i le tuai ona fausia le maketi i Fugalei ona o le faalalā ma le timuia o nisi o le aufaifaatoaga e lē o maua ni avanoa e maua ai se malu i le nofoaga pumoomoo i le lotoā a le afioga Toleafoa Faafisi i Fugalei o loo faaaogā nei e faatau ai faaeleeleaga ma isi oloa e aofia ai ma taumafa.
Ua tatala ai nei e le faalapotopotoga o taui o faalavelave faafuasei se vaega o le eleele sa iai le maketi i lea vaega o le taulaga, e agai atu i ai le aufaifaatoaga e faaaogā e pei ona vaaia nei le faatutū ai o faleie ma tala ese se vaega o le pa apa o loo siomia ai le fanua talu mai le taimi na tala ese ai le maketi tuai, ma amata tanu le fanua mo le fausia o se maketi fou, lea e lei pa‘ō lava ni samala a le au kamuta ona ua toe iai se isi suiga i le ata e pei ona lē fogafalelua ae ua fogafale tasi, ma o loo faatali le toe faasalalauina o tauofoga mo se kamupani e fausia.
O le vaiaso la na tea nei na amata ai ona faaaogā se vaega o lea fanua o le faalapotopotoga o taui o faalavelave faafuasei, o latou e pulea le maketi, ina ia mafai ona agai i ai le aufaifaatoaga e faatau ai a latou meamata ma fua o laau ‘aina eseese. O le nofoaga o loo faaaogā nei e vaapiapi tele, o le mafuaaga lea ua faasolosolo ane ai nisi o le aufaifaatoaga i autafa o le alatele agai i uta, ma ua faaalia ai popolega ona o le ono afaina o se soifua o se isi i taavale feoai aemaise o le pefu, le la ma timuga.
Toe sui le ata fausaga maketi fou i Fugalei
Ua faailoa e le Minisita o Tupe le faia o se suiga i le ata e fausia ai le maketi fou i Fugalei, lea sa fuafua muamua e fogafale lua, ae peitai o le a na o le tasi le fogafale. O se suiga na mafua ina ua toe iai se faaiuga a le Malo ia toe faia se suiga ina ia mafai ona fausia se maketi i le tau e sefulu miliona tala.
E oo mai i le taimi nei e lei amatalia le galuega ae ua ua oo i le tasi le miliona valu selau afe le tupe ua faaalu mo le na o le tusia o le ata ma isi tapenaga amata o lea galuega ua savalia nei le tausaga ma masina o fuafua mai.
O loo fausia nei se isi nofoaga fou o se maketi ua iai ma nofoaga mo isi ituaiga o pisinisi e mafai ona faaaogā ma o se atinae a le kamupani a Ah Mau lea ua molimauina le sologa lelei ma ua lata mai se taimi e mae‘a ai.
O le tasi lea o nofoaga ua iai le talitonuga o le a mafai ona agai i ai le au faifaatoaga e faatau ai a latou faaeleeleaga faapea foi ma i latou o loo faia pisinisi laiti sa faafoe i le maketi tuai i Fugalei a o lei talaina mo le toe fausia.
