O le asō i Samoa lea ua faamanatu ai le aso ua faapitoa mo le fanau a le atunuu, le Lotu a Tamaiti.
O se aso e tuu ese uma ai lava le mau galuega ma le mau fuafuaga a le atunuu ae sagai ane e manatua fanau ma lo latou ola tuputupu a‘e aemaise ai i le folafolaina o le tala lelei i fata faitaulaga e fia o le atunuu.
O sauniga lotu na amata mai lava i le taeao po ma faaauau mai i le aoauli mo nisi ua molimauina ai tauloto, pese, siva faaleagaga aemaise tala ma lauga ua momoli mai ai e fanau a le atunuu le mau faamanatu o le soifuaga e tatau ona manatua ma savavali ai mātua.
O tausaga e tele o lenei aso faamanatu ua manino ai le tele o suiga ae o le faavae lava ina ia manatua fanau.
O le faamatalaga a le susuga i le Faafeagaiga ua maliu atu o Rev. Sulufaiga Samasoni a o Taitaifono o le Ekalesia Faapotopotoga Kerisiano Samoa, na amata mai lava le Lotu a Tamaiti ona o le mau a Misionare sa faatautaia aoaoga i le Kolisi Faafaifeau i Malua i le faato‘ā amata ai o lea aoga, e tatau ona ave se Aso Sa se tasi e faatāua ai fanau ma ia ave uma lava le faatautaiga o le sauniga i fanau, ona o le tele o taimi e faatino ai sauniga lotu e aveese lava fanau talu ai le faigata ona tau taofiofi le ulavavale o tamaiti.
Na amata mai iina lea mafaufauga ae o lea ua avea ma se tasi o aso tāua tele i le kalena a le Ekalesia, faapea ai isi Ekalesia lotu i totonu o Samoa, aemaise ai foi le Malo. Ua atofa ai foi i Samoa nei lava ia le Aso Malolo ua faapitoa lava mo fanau a le atunuu.
Ua lē gata la i lenei faaeaea, ae ua avea lenei faaiuga o le vaiaso, ma taimi pisi o le tausaga auā ua faaaogā foi e le au faipisinisi lenei vaitau o se vaitaimi tāua tele mo fefaatauaiga.
E iloa lelei lava o le vina o le tamaititi e faigata tele ona taofiofia ma o le mau faalauiloa ua vaaia nei foi i luga o televise e faatatau lava i pa‘ū e tele ua iai nei mo teuga ma lavalava a le fanau aemaise foi taumafa o lenei Aso Faapitoa.
Mo le Afioga i le Sui Palemia, Misa Telefoni, o tausaga uma lava e iai ana meaalofa e ave i fanau a le Itumalo o loo tulai mai ai o le faipule, o Falelatai ma Samatau.
E ui lava foi la i faigata lea ua faatulai ese mai ai le Afioga i le Sui Palemia mai lea itumalo i le vaiaso na tea nei, ae na faaauau lava lana meaalofa i fanau o le itumalo.
Mo aoga laiti e valu a le Itumalo o Falelatai ma Samatau, na tofu uma tama ma teine aoga o ia aoga ma le ta‘i $5 – o se meaalofa ua taumafai lenei tamalii e faafiafia ai fanau i lo latou aso faapitoa, ma o le faaiuga o le vaiaso na agai atu ai ma lona faletua ma nisi o ona alo e tauaao atu lea meaalofa.
Na gata lava le Afioga i le Sui Palemia i Samatau ae na faaauau atu le foai e lona faletua ia Sera ma le fanau e toalua na mafai ona malaga faatasi atu.
O le taimi mulimuli o lea foai i le tausaga na tea nei e tusa ma le $6,000 (tala Samoa) na alu ai i fanau a le itumalo, peitai e lei iai se manaoga o le Afioga i le Sui Palemia e iai ni tusitala i lea meaalofa i lenei tausaga, ona o se meaalofa lea ua ia avatu mai i lona lava aiga mo fanau a Falelatai ma Samatau. E fai i tausaga uma ae e leiloa lava e tusitala ona o lona manaoga ina ia aua ne‘i tala‘ia.
E ui i lea e lei mafai ai ona taofia le faafetai o tina sa molimauina le foai o lenei tausaga. E lei ta‘u maia pe fia se tupe atoa na alu i lea meaalofa ona o le manaoga lava lea o le aiga ina ia aua ne‘i faalauiloa fua le meaalofa a lea taitai.
O le faamanatuga foi o le atoaga o le tausaga o le sunami na manatua ai foi fanau e toatele a Samoa na motusia faafuasei o latou ola laiti i lenei faalavelave. Na tatala ai ma le faleaoga o Satitoa se tasi o nuu na matuā aafia i lenei faalavelave i le vaiaso faamanatu ua mae‘a atu.
O le afioga la i le Tui Atua Faanofonofo, se tasi o faauluuluga faaleaganuu o le Atu Aleipata, o Tafua Maluelue, na ia foai atu se tinoitupe e $15,700 (tala Samoa) e fai uma ai togiga a le fanau aoga o le aoga laitiiti lea a le afioaga o Satitoa.
O se foai na ia ta‘ua ua faia ona o le agaga faafetai ua faasaoina ia fanau a Aleipata mai le galulolo na fano ai le toatele o fanau a le itumalo aemaise fanau laiti.
O le aoga lenei e lei leva lava ona tatala lona faleaoga fou ae tulai mai loa ma le galulolo. Na talepe i lalo le pa i tua o le faleaoga ae alu le tuli a le fanau i uta ma e leai ma se tasi na maliu ai i le taeao o le aso 29 o Setema 2010, ona o le vave ona o ese le fanau mai le faleaoga. O le faleaoga fou o Satitoa ua fausia nei i gauta o le nuu i le nofoaga ua toatele ua faamautu ai i le taimi nei.
O le faamāmā avega faaopoopo la lea na tauaao i ai le afioga Tafua Maluelue, ua salani ai le tatalaga o le faleaoga fou mo le fanau i Satitoa Aleipata. Ua fesoasoani foi i le feagai ai o le tele o mātua ma sauniga o le Lotu a Tamaiti o lenei tausaga.
