O loo maitauina pea le lelei faafoe o le aoga poo le taumafaiga ma polokalame a le Village Trust, o loo faauluulu i le afioga ia Laauli Michael Jones ma nisi o tamalii o loo latou galulue faapaaga. Ua faaigoaina lenei aoga o le Island Village Sports Academy (VSA).
O le gasologa manuia pea o le faafoeina o lenei polokalame, o le a faapea ona afea faapitoa ai e le asiasiga a le Konesula o le malo tele o Amerika , le susuga ia Jim Donegan le ofisa i Avondale o lenei aoga.
O le autu o polokalame a le VSA, o le taumafai lea ina ia tapueina ma faatupu faamoemoe i le olaga aoaoina o alo Samoa faapea le Pasefika, aemaise le tupulaga ua lē o toe auai i aoaoga masani, pe na vave nonofo foi ma le aoga ae lei ausia pe maua ni tusipasi aloaia mo aoga maualuluga.
O le atoaga foi o lenei polokalame, o loo faaaogaina ai mataupu tau taaloga ina ia tosina atu ai manaoga o le tupulaga talavou, ma toe faaauau a latou aoaoga.
O le foai faasikolasipi mai le Ofisa o le Konesula a Amerika – ua ta‘ua o le Ambassador Scholarship, e $3000 lona atoaga, ma o le lona tolu ai lenei o tausaga o faatinoina pea lenei foai. O se foai faasikolasipi ua maitauina lona aogā tele aemaise tupulaga o loo aooga ai i lenei polokalame.
E silia ma le 200 le aofai o alo Samoa ma le Pasefika o loo auai i lenei aoga, ma e le gata ia latou polokalame faatino i o latou nofoaga autu, ae o loo faapea foi ona fesoasoani i le tele o nisi o alo ma fanau o loo iai i aoga maualuluga aemaise foi o le foai e ala i taumafataga foai fua (food bank) i Aso Faraile uma.
O le faamoemoe lenei mo le afeaina o le ofisa o le Village Sports Academy e le asiasiga a le Konesula o Amerika, o le a faatinoina lea i le Aso Lua, 1 Iulai i le itula e 9 i le taeao i le nofoaga o le Village Trust Academy, 26 Racecourse Parade, i Avondale.