E $150,000 tala Amerika ua ofo mai e le Ofisa o Fesoasoani a Amerika, le USAID – mo le fesoasoani ai i pisinisi poo atinae tau tagata asiasi mai i Samoa ua manino le tele o suiga ua faatautaia e a latou atinae e tali atu ai i suiga ogaoga o le tau.
O le vaiaso lenei sa asia ai e le sui o le malo o Amerika i Samoa o Charles Berbert ma se alii o loo nafa ma le iloiloga o atinae e ave i ai lea fesoasoani – nisi o mataaga tumatafaga ma isi atinae tau tagata tafafao maimoa mai i fafo i vaega eseese o le atunuu.
O le taumafaiga lea e silasila ma asia nofoaga nei ua fausia e tali ai malo mai fafo aemaise poo ā gaioiga ua faatino ina ia mautinoa e nofo sauni ma mafai ona tali atu nei pisinisi i le toe tulai mai o ni faalavelave faalenatura e ono lamatia ai soifua o i latou uma e galulue ma o loo asiasi mai i fafo.
O le amataga lenei o le fesoasoani o asiasiga ua faatautaia ae na ta‘ua e le ofisa o Amerika i Samoa, o asiasiga nei o le a faamautu ai loa poo ā tonu lava atinae e agai i ai le vaevaega o le tinoitupe ua tauaao mai e le USAID mo nei atinae.
O le unai o lea polokalame o le lava o le tomai o tagata Samoa o loo faatinoa ia atinae i suiga o le tau, le aafia e tulai mai i taimi o faalavelave faalenatura aemaise o auala ma metotia e faaitiitia ai le maumau o soifua ona o ia faalavelave ma suiga faigata.
O loo iai se isi laasaga o le polokalame lenei e galulue faatasi ai Malo Aufaatasi, le ofisa o Amerika ma le Pulega o tagata tafafao mai fafo a Samoa mo se tupe tele e tusa ma le $7.1 miliona tala mai le faalapotopotoga o tupe mo puipuiga o le siosiomaga Global Environmental Fund GEF – ma o se isi lea galuega ua feagai nei ma lea ofisa ma ofisa e pei ona ta‘ua faapea ai le ofisa o le siosiomaga o le Pasefika le SPREP e faalautele ai galuega ma suiga i le tali atu o nei pisinisi i suiga ogaoga o le tau.
O lea foi ua mae‘a se aoaoga na faatupe e le Pulega o tagata tafafao maimoa mai i Fafo mo le tomai o le laveaia o soo se tasi e aafia a o i gataifale o le atunuu.
O se aoga na faatautaia e ni tamaitai se toalua mai Ausetalia o loo galulue i Samoa mo le isi lua tausaga aemaise o sui o le Pulega o Tagata tafafao mai, mo le faamautu ai o tagata o Samoa nei o le a faatautaia ma faaauau lea ituaiga auaunaga.
O life savers e pei ona silafia ai i le gagana peretania, e lē o se auaunaga e masani ona vaaia i Samoa ae o le mae‘a ai o aoaoga na faatautaia i Upolu ma Savaii talu mai le masina o Me o le tausaga nei, o lea la ua faamautu mai i latou e to‘a 117 ua faamaonia tusipasi muamua o nei aoaoga.
O le taumafaiga a le Pulega ina ia tofu lava mataaga tu matafaga, o faletalimalo ma isi nofoaga e agai atu ai le atunuu ma tagata tafafao mai mo taelega ina ia iai nisi e vaavaaia lo latou saogalemu a o iai i le sami.
O loo fesoasoani le malo o Ausetalia i le pulega o tagata tafafao mo lea polakalame tāua.
O le fesoasoani foi a Ausetalia e tusa ma le $4 miliona tala Samoa ua toe faamautu i le faaiuga o lenei vaiaso i le va o le Hai Komesina o Ausetalia atoa ai le Minisita o Mataupu tau tina ma tamaitai, atinae o nuu ma aga fesootai, le fetalaiga Tolofuaivalelei Falemoe Leiataua.
O le feiloaiga i le va o nei taitai e lua ua faamanino ai e le Hai Komesina polokalame ua ave i ai le lagolago tele lenei a le Malo o Ausetalia.
O le tali atu la a Ausetalia i le valaau ua aloaia mai i taitai o le Pasefika i se fono na usuia i Papua Niu Kini i le amataga o le masina nei, na auai atu i ai le tofa Tolofuaivalelei Falemoe Leiataua.
O lea valaau ua faamautu ai le manaoga ina ia saga unai le lagolago e ave i tagata e iai manaoga faapitoa. O le fesoasoani poo le lagolago la lea a le malo o Ausetalia ua aumai i Samoa nei auā le itu tau i le faaleleia o aoaoga.
O le aoga lea na tatala ananafi o aoaoga mo tagata e iai manaoga faapitoa ua aofia i aooaoga a le kolisi o matata eseese a Ausetalia i le Pasefika le APTC atoa ai isi mau fesoasoasni ua ofo atu i nofoaga tutotonu mo le atinae o soo se tagata e iai manaoga faapitoa i totonu o le atunuu.
O le faafetai a le Matagaluega o tina ma tamaitai atinae o nuu ma aga fesootai, e ala i le alii minisita, o le amanaia e Ausetalia o lenei talosaga ua faaleo e taitai o le Pasefika ma ua faamāmā avega foi ia Samoa i le taumafai ai e mulimulitai i manaoga o tagata ua iai manaoga faapitoa i lenei itulagi.
