E ui o Samoa ua na o se togi i luga o le faafanua o le lalolagi, ae ua molimauina le toatele o tagata tafafao maimoa mai fafo o loo asiasi mai pea e fia maimoa ma tafafao ai mo faiga malologa.
O loo i Samoa nei le ulugalii papalagi mai Sini Ausetalia sa muai faatautaia se pisinisi i Samoa nei i tausaga ua mavae, o le ave o turisi i nuu e molimau ma maimoa i le aganuu faasamoa moni.
O le malaga mai ai o Geoff ma Barbara Hoddinott ma le la tama teine o Lauren i lenei vaitau o le tausaga, o le faamoemoe e faailogaina le 60 tausaga o Geoff lea sa faamanatu i le faletalimalo o Safua i Savaii i le vaiaso na tea nei.
O le faimalaga mai foi mo le aso fanau o Geoff ua maua ai se avanoa tāua e tauaao ai le foai o se tinoitupe e $1,027 tala Samoa a Lauren mo le aoga a le Loto Taumafai lea o loo aotauina ai alo ma fanau o loo iai manaoga faapitoa.
O lea feasoasoani na ta‘ua e Lauren, o se seleni e maua mai i le faatauina o ana keke (cup cakes) i lana aoga atoa ai ma le fesoasoani a lona aiga ma ua manatu o ia e fia fai meaalofa ai mo le aoga a le Loto Taumafai.
Na faafetaia foi e le pule aoga, Filifili Savaiinaea lea fesoasoani tele mo le aoga ma o se tasi lea o a latou paaga o loo alolofa atu pea mo fanau o loo aotauina i le laumua.
Mo le silafia, o Geoff ma Barbara sa fai le la pisinisi sa faaigoaina o le “Samoan Snark” e faaaogā ai lo la vaa, e feaveai ai turisi sa asiasi mai i Samoa ma nonofo i le faletalimalo o Aggie Grey i ni faiga malaga faapitoa mo nuu i tua. Ma o le toe asia mai e le ulugalii o Samoa, ina ia faamanatuina le aso fanau o Geoff faatasi ai ma le tauaaoina o le foai a le tamaitai o Lauren mo le Loto Taumafai.
