O pusa o taumafa atoa ai ma le seleni sa tauaaoina e le a‘oga a Robertson Rd i Magele e faailoa atu ai lagona o le tiga faatasi ma le fia fesoasoani i le toatele o aiga ma fanau, uo ma aumeamamae o loo mafatia pea talu mai le mafuie sa aafia ai.
O le taumafaiga sa tuufaatasia lava e le fanau ma faiaoga o le a‘oga i Magele.
E lei maua pe na iai, ae pe ua iai foi nisi a‘oga sa latou faatinoina lea tulaga i le taimi nei, peitai ua na pau lea o le a‘oga ua maua e le tatou nusipepa ua latou faatinoina lea fesoasoani.
O le foai sa tauala ma faaui atu i le faalapotopotoga a le Salvation Army e faaooina le fesoasoani a fanau ma faiaoga. O se tasi o alii pule o le Salvation Army sa fai ma sui o le faalapotopotoga e taliaina le foai. Sa auai vasega maualuluga o le aoga faapea foi le tamaitai sui pule ma faiaoga i le aoauli o le Aso Tofi sa tuuina atu ai le fesoasoani.
O se avanoa tāua tele foi na maua i lea aso e ala i le tali mai o le sui o le Salvation Army, ma toe faapupula ai i le fanau le faamoemoe ma le galuega a le faalapotopotoga talu lava ona amata mai.
Sa ta‘ua e le alii pule e faapea, o le sini autū ma le faamoemoe, o le agai lea e faamautu le tele o fesoasoani mo soo se tasi lava aemaise foi o aiga o loo fia maua se fesoasoani.
O le tulaga o taumafa, o lavalava ma le tele lava foi o isi auaunaga e pei o le fuafuaina tatau o tupe maua ma tupe faaalu a le aiga, o isi ia o fesoasoani o loo mafai foi ona ofoina mo se tagata lautele e manaomia.
E lē tau faailoaina le auaunaga a le Salvation Army i le atunuu atoa.
Sa faamanatu foi e le alii pule i lana saunoaga, le tāua tele o le foai ma le agaga sa faataunuuina ai e le a‘oga lea fuafuaga.
O le ala foi lea sa matuā talia ai ma le fiafia tele, atoa ai ma le agaga faafetai ona o le alolofa ma le agalelei, mo i latou o loo feagai ma mafatiaga.
O le faaiuga o le saunoaga a le sui o le faalapotopotoga sa ia faalautele ai le finagalo alofa o le Atua mo soo se tagata, ma e faapea tonu le auga ma le faamoemoe sa amata mai ai i le tele o tausaga ua mavae, ma e fiafia pea e faaauauina mo le lumanai.
E toalua tamaiti a‘oga sa fai ma sui o le a‘oga e faaleoina le tuuina atu o le fesoasoani sa saunia ma tapenaina.
Sa molimauina foi i lea aso le fiafia o tamaiti a‘oga ina ua fesiligia le mafuaaga sa faigofie ai ona tuufaatasia le foai tupe ma meaai.
O le a‘oga lenei a Robertson i Magele, o le 80% o tamaiti o alo ma fanau a le Pasefika e aofia ai ma Samoa.
