Foai le Pulenuu o Campbelltown i Ao Sinasina

Na vaaia  le agaga fiafia o le mafutaga a tuaa sinasina a  Campbelltown ina ua foai ai e le tamaitai pulenuu ia Sue Dobson se siaki e $880.00 mo fuafuaga faagasolo.
O le Peresetene o le Ao Sinasina i Campbelltown ia Sa‘u Tauiliili Malaeulu na taliina lenei mealofa tautele.
O nisi o sui o le komiti na auai atu i lea faamoemoe e aofia ai le Failautusi le tamaitai ia Seumanu Perosi, Ane Taanoa le teutupe, Laalaai Polataivo le Public Officer aemaise Polataivao Tanea.
O lenei mafutaga ua tapena atu nei mo se mafutaga tele i le masina fou tuufaatasi ma isi sui a tuaa sinasina mai Blacktown ma Mt Druitt faapea Bankstown lea o le a faia i le Maota o le Ekalesia PIC i Lakemba.
O nisi o Polokalme a le Ao Sinasina ua faatinoina i lenei tausaga e aofia ai le asiasiga e tafafao i le ZOO ma molimoli atu foi sa latou pale i le Faamanatuina o le ANZAC i Campbelltown e faailoa ai lo latou lagolago.
Ua fiafia foi nai tina ma tamā matutua e auai atu i nei mafutaga e feiloai atu ai ma tafafao ai i polokalame o loo faagasolo ai i mataaga ma nisi aoaoga mo tagata matutua.
Na saunoa le Peresetene o Lau Samoa, Alaalatoa Emani i le faagaeetia o le mafutaga i le amanaia o la latou faatagi atu i le ofisa o le pulenuu aemaise lenei foai ua taulimaina.