O le vaiaso lenei e tatau ona aveese ai mai i se vaa la‘uuta o loo taula i le taulaga o Apia, se loli tineimu ua iai uma meafaigaluega mo galuega fesoasoani muamua, ua ma‘au i ai se faalapotopotoga i Siamani.
O se fesoasoani lenei e tauaao atu e lenei faalapotopotoga ua ta‘ua o le Hamburg-Samoa club mai le aai o Hamburg i Siamani.
O loo i Samoa ni sui o lea kalapu ma le faamoemoe e toe sailiili nisi auala e saga fesoasoani mai ai i tagata ma le malo o Samoa.
O loo taitaia lenei faigamalaga i Samoa e le Konesula o Samoa i Siamani, lea o loo i le aai o Hamburg lona ofisa tutotonu, o ia lea o Dr jun Ascan Pinckernelle, o lona faletua ma sui o lea kalapu o tina ma tamā Siamani lava ua iai fesootaiga i tausaga ua mavae ma Samoa.
O nisi o alo o ni tagata na galulue i Samoa i le vaitau a o vaaia e Siamani le atunuu.
E le gata i lea o ni tagata na asiasi mai i Samoa i tausaga ua mavae ma ua iai pea le manaoga e fesootai ma Samoa e ala i fesoasoani e mafai ona ofo mai i lo tatou atunuu.
Ua sefulu (10) tausaga talu ona iai lenei fesootaiga a lea faalapotopotoga ma Samoa, ma e tele ina faaauala mai foi i le faalapotopotoga o le Roteri poo le Liona a latou fesoasoani sa mafai ona tauaao mai i tausaga ua mavae.
E aofia i ia fesoasoani le toe faaleleia o le Ofisa o le Vaaitau i Mulinuu e pei ona latou ofo mai ai ni meafaigaluega auā le faaleleia atili o le auaunaga tau i le vaaitau.
O le saienitisi muamua lava na galue ma faatū le ofisa o le Vaaitau i Samoa o ia lea o Otto Titens, o se alii Siamani na ia tapu‘e nisi o ata o le tau faatuina o le vaaitau aemaise foi o mea sa tutupu i Samoa i ona vaitau o le 1800 a o galue ai i Samoa.
O nisi o fanau a ana fanau o loo fesootai pea ma Samoa ma ua foai mai foi nisi o ata na tapu‘e e lea tamā i le Mataaga o Samoa aemaise le ofisa o le Vaaitau.
O le loli tineimu la ua o latou foai ma na faapea foi ona o latou foai mai se tinoitupe e tusa ma le $50,000 (tala Samoa) ina ua tulai mai puapuaga o le sunami ma na tauaao atu i le Liona o Samoa auā le fesoasoani ai i galuega laveai ma fesoasoani na faatautaia ona o lea faalavelave faalenatura.
Ua iai foi le manaoga o lenei faalapotopotoga ina ia toe teu ma vali atoa le nofoaga ua iai le maa faamanatu o le Malo o Siamani a o vaaia Samoa, lea o loo i Mulinuu ma ua faamoemoe lenei aumalaga e faatino lea galuega toe faafou o lea maa faamanatu i le taimi a o iai i Samoa. E masina atoa le latou asiasiga.
Na feiloai atu lenei aumalaga i le afioga i le Alii Palemia le susuga Tuilaepa Lupesoliai Sailele Malielegaoi ma ua valaaulia aloaia nei e le taitai o le Malo e avea i latou nei ma nisi o Malo Faaaloalogia o Samoa i le faamanatuina o le Fu‘a o Samoa ia Iuni.
