Foai le ETV mo e ua mafatia i le tsunami

Sa iai le manatu atonu e tetele timuga o le faaiuga o le vaiaso i le atu Aleipata ma le atu Falealili a o faagasolo ai le faaaliga o ata o alofaaga mai i Niu Sila mo aiga i Samoa nei. Peitai na matagofie po uma e lua o le amataga o lenei taumafaiga e faafiafia ma ofo atu foi sina pauna ata mo i latou ua mafatia i puapuaga o le galulolo.
E lei maea ona faatutu masini ma meafaaili a le vaega a le ETV Productions, le WTMedia, le Soifua Maloloina ma nisi lava o alo o Samoa na tuufaatasia lenei taumafaiga ae ua tumu atu le fanau mai afioaga e pei o Lalomanu, Saleapaga, Saleaumua, Satitoa ma Lepa i nofoaga ua atofaina mo lenei faaaliga.
O ata o alofaaga ma faafiafiaga mai i aiga i Niu Sila ua faavava atu ai ma ata o Mr Bean, faleaitu Samoa ma isi faafiafiaga ma o se faiga na oo lava i le 11 i le po o molimauina ai le faafiafiaina o afioaga mai i tamā ma tinā matutua e oo i fanau laiti na maua le avanoa e oo atu ai i lotoā o aoga ma maota o aiga na faatautaia ai nei faaaliga.
Mo i latou na faatautaia lenei faamoemoe o le aao mafola o i latou uma mai i matagaluega ma faalapotopotoga o le Malo, o kamupani ma faleoloa na ofo mai taumafa ma vaiinu mo i latou na maimoaina nei faaaliga o ata aemaise o taavale na ofo fua mai mo le feaveaia o i latou mai i nofoaga fou ua faamautu ai, o se taumafaiga e faagaeetia ai foi le loto ona o le tali mai o le atunuu e ui ua umi se taimi ma ua tele foi le seleni ua faaalu i fesoasoani o le sunami.
O le suiga tele i le faafiafiaina o i latou na aafia, o le tali aupito faamalie loto lea e pei ona taua e i latou na faatautaia lenei faamoemoe.
O le ETV Productions a Eliza Hunt na mafai ona maua ai ni vaaiga o le tsunami e le toatele i Ausetalia, Niu Sila ma Amerika i le gagana Samoa ma o le seleni na aoina e lea tamaitai mai i DVDs na faatau atu o lea faalavelave faalenatura na ia foai ai se tinoitupe e $20,000 tala Samoa mo le galuega faaauau a le Malo i le fesoasoani e tali atu ai i aiga ua aafia i lenei faalavelave.
O le vaiaso lenei ua faaauau ai le faaaliga o ata nei na pue mai i Niu Sila atoa ai ata malie ma faafiafiaga. 
O le atu Falealili lea ua oo i ai le faasologa o lenei polokalame.