E $700 se tinoitupe na ave e se tamaitai i le afioaga o Vaimoso e fai ai se taumafataga a le afioaga, e ui o lea na te teena malosi le tuua‘iga o loo fai se la faanunumi ma se alii, o loo fai lona toalua ma o loo nonofo i gauta o le afioaga.
O le Fetalaiga Manuleleua Mele, o se tina ua iloga foi lana tautua i le atunuu e ala i lana nusipepa na faapea ona faatau i Samoa, o Le Mau, atoa ai ma lona sao i le aofia ai i le vasega o Faatonu mo le Faamasinoga o Soligatulafono.
O le tuua‘iga ua faia faasaga ia te ia na fai o lona tetee tele i ai, ae o le tetee ai o le alii ua tuua‘ia.
Na talo se feiloaiga e le afioaga o Vaimoso ina ua oo atu se tasi ma se ripoti faapea o loo vaaia lava le alii lea o loo nofo ma moe ai i le fale o Manuleleua ae o loo fai le toalua ma le fanau o loo nonofo i gauta o le nuu.
Na aami faatasi lava lea matai tamaitai faapea ai le alii lea ma lona toalua.
E tasi le po na faaafe ai i latou ma lana fanau ma lona toalua e le tamaitai ua tuua‘ia, o se mau lea a le toalua o le alii ua tuua‘ia. Na faaalia e lenei tina talavou na mafua le vavao o ia ma lana fanau e momoe ona ua mae‘a le sailiga o lona toalua e pei ona fesoasoani atu ai lea tamaitai o se matai taua foi o le afioaga o Vaimoso lea na oo i ai lenei tina e saili i ai lona to’alua.
Na foi ane le tamaloa ma le tamaitai ua tuua‘ia ma vavao loa e lea matai le tina lea ma lona toalua ma tamaiti e tofafa i lona laoa a o lei usu ai i le taeao e sosoo ai. O le po lea na ta‘ua e le tina talavou lenei na te‘i ane ai ae vaaia lona toalua ua sau mai i le potu o le tina ua tuua‘ia.
O se tala ua matua teena lava e Manuleleua ma le toalua o lea tamaitai.
Na faapea ona le faia e se nuu se faasalaga faasaga i lea matai ae lapataia e aua ne‘i toe maua mai ni lipoti i le nuu e faatatau i lea mataupu aua a toe tulai mai ni faitioga o le a faatulai ese loa lea tamaitai ma le alii ua tuuaia le faia o se va faaleulugalii ma le matai ua ta‘ua.
E ui o loo ia tetee i le faasalaga a le afioaga ae na ofo lava le Fetalaiga ia Manuleleua Mele na te saunia se ti taumafa a le afioaga. O lea la na oo atu i le nuu le tinoitupe e $700 e faatau ai se latou ti taumafa.
O le vaiaso lava lea na tea nei na toe maua ai le tina lenei ma le alii lava lea ua tuua‘ia e se tasi o matai o le aiga lea, o ia lea na ia ta‘ua o loo tausia faatasi ma le matai tamaitai lenei lo latou aiga i lea itu o Vaimoso.
Na fasi e le matai lea le tamaloa ua tuua‘ia ma tuli i lona toalua ma lona aiga ae ua tapu le toe tu atu i fanua i tai.
Na toe oo lava i le afioaga lenei mataupu ma ua talia nei le isi Aso Gafua a le nuu, o lona uiga o le isi lua vaiaso o loma nei ina ia fai sa‘o loa se faaiuga a le afioaga, o se faasalaga sa‘o loa lea o le a tuu atu i lea tamaitai ona o le faanunumi lea na ia teena ae e foliga mai ua toe maua foi ma ua faamaonia ai e le afioaga.
O faasalaga i le faia o gaioiga faapea ua tuua‘ia ai nisi i le mulilua poo nisi uiga e aafia ai le va faaleulugalii i totonu o nuu, ua tele lava ina ave i ai le faamamafa a pulega a alii ma faipule, ae o le tulafono ua laga muamua finagalo o Faamasino ua talafeagai lelei le aofia i iloiloga o teuteuga o tulafono ua feagai nei ma se vaega faapitoa ua tofia e le Malo e ta‘ua o le Komisi o le toe iloiloga o Tulafono.
O le mafuaaga ona na ta‘ua e se tasi o Faamasino o le Faamasinoga i Samoa, o mataupu nei o mataupu ua faasaga tonu i amio a tagata ma o amio ma uiga o tagata e tatau ona iai se isi faamasinoga e agai i ai ae o le Faamasinoga o Soligatulafono e tele isi mataupu e amata atu lava i le gaoi, talepefale seia oo i le fasioti tagata – o ituaiga solitulafono ia e talafeagai tonu ma le Faamasinoga lea.
Ae i uiga e pei ona tulai mai i le matai tamaitai lenei ma le alii ua tuua‘ia, e tatau lava ona iai se isi Faamasinoga e ave i ai e pei la o pulega a alii ma faipule poo se vasega faapitoa foi i totonu o ekalesia latou te faatautaia iuga o uiga faapea.
Ua iai faasalaga o loo faapea ona aafia ai sui o aulotu pe a tulai mai ia uiga ma ua tele ina aveese ai tofiga aemaise o le tulaga o le avea ma tagata ekalesia ma ua faapena foi ona vaaia i totonu o afioaga, e pei o Vaimoso. O le Aso Gafua muamua o Iulai le isi fono a le afioaga o Vaimoso.
