“Na maligiligi o‘u loimata ma ou faapea ifo, se mea e faigata o le alofa ma vaai i le lumanai o alo ma fanau ina ua faatino le foai a nei matai o Satitoa i le fanua e silia i le lima eka ua fausia ai nei le faleaoga tulagalua fou”.
O le saunoaga lea a le susuga i le tiakono o le ekalesia Papatiso mai Niu Sila le susuga Ben Penita Taufua, o loo fai ma sui o le ekalesia Papatiso Samoa e galulue ma le alii faifeau o le ekalesia Papatiso aoao i Niu Sila i le fuafuaina o seleni e faaalu i le galuega o le faleaoga, ina ua mae‘a ona suaina le eleele e fai ma faailoga o le amatalia o le galuega.
O le Aso Lulu, 12 o Me 2010 na faatino ai lea vaega tāua e pei ona saunoa ai le alii Palemia, susuga Tuilaepa Lupesoliai Sailele Malielegaoi ma ia faafetaia ai le agalelei o le ekalesia Papatiso aoao i Niu sila i lana polokalame fesoasoani, faapea le polokalame fesoasoani mo tagata mafatia a le Malo o Niu Sila ua mafai ona faatupe ai le galuega.
O le faleaoga o Satitoa na faatamaia uma i le sunami o Setema 29 o le tausaga na tea nei 2009. O le taimi nei ua leai se faleaoga mo fanau a le nuu, ae o nisi o laoa ma maota o loo faaaogā e tau ina faaauau ai vasega a le fanau, a o faatalitali ai le mae‘a o le faleaoga fou.
E silia i le ‘afa miliona tala Samoa le tau o le galuega, auā e tutusa le sea o le ekalesia Papatiso ma le polokalame fesoasoani mo tagata mafatia a le Malo o Niu Sila e tai $150,000 tupe Niu Sila.
Fai mai le Tiakono o Penita sa mae‘a ona tusi le ata o le galuega ae maua ane le tau e silia i le miliona tala Niu Sila, ma faapea ona toe fetuunai ai le tau ma avanoa ai se feiloaiga ma le taitai o le Malo i le alii Palemia, lea na faailoa ane ai e sili le saili o se konekarate faufale i Samoa atonu e mafai ona gafatia ai le afa miliona tupe Samoa e fausia ai.
O le agaiotupu o se tamalii mai le afioaga o Lepa ua ia fausia le galuega. “O se fiafiaga lea ia i matou sa feagai ma feutanaiga o le galuega ina ua mafai ona taunuu le faamoemoe”, o le finagalo lea o le tiakono.
Ua faailoa mai e se tasi o le afioaga o Satitoa, o le fanua ua fausia ai le faleaoga o se foai a matai e toaono e aofia ai Lesa Tony, Te’o Simi, Togafau Emila, Ti’a Leaiga, Malaga Esera, ma Tafale Lemusu. Ua uma ona faapepa le foai ma o se faailoga lea o le naunau o nei matai e faatino loa se meaalofa auā alo ma fanau lalovaoa o Satitoa e le gata mo nei ae o le lumanai.
O le masina o Setema o le tausaga nei ua faamoemoe e tatau ona mae‘a ma umusa ai le galuega.
Sa auai i le sauniga o le suaina o le eleele le Pule Sili o le Matagaluega o Aoga a le Malo, Galumalemana Nuufou Petaia, faapea sui sinia o le matagaluega. Sa faatasi ai foi le alii faipule o Aleipata itupa i lalo lea e aofia ai Satitoa le afioga Muagututia Siaosi Meredith ma lona faletua aemaise o le paia maualuga o Tupu ma Ee o le afioaga, tainane le Pule aoga ma le vasega o faiaoga o le aoga tulagalua a Satitoa. O se tasi lea o afioaga na maliliu ona tagata i le sunami ma aafia foi laoa ma maota i le malosi o lea mala faalenatura e pei ona sa afea foi i se fesoasoani a le ekalesia Papatiso aoao mai Niu Sila.
