Foai e tamafanau a Letogo i Niu Sila togiga fou

Poo fea lava e alu i ai le Isaraelu, e susue lava le faamalama o lona fale ma tilotilo i lona nuu moni na soifua ma fanau ai.
O le mau lea a le Peresitene o le Kalapu Lakapi a Letogo i Aukilani i Niu Sila, le tofa Ulamai Ese ina ua tauaao atu le meaalofa a le kalapu, o togiga fou e lua mo le Senior-A ma le Under-20 a le kalapu lakapi a Letogo i Samoa.

Ua aofia ai foi i le foai ma togiga mo le pulega o le kalapu e aofia ai ma le faiaoga, o se tasi o alo tautaua o le afioaga i le Manu Samoa, le afioga Muliaga Bryan Lima.

“O le lagona fiafia ona ua manuia le matou sailiga tupe ma faatino loa le fesoasoani e pei ona talosaga atu le Peresitene ma le taitai o le kalapu le afioga Mulipola Ausetalia”.

O le finagalo lea o Ulamai Ese ina ua tapa sona finagalo e tusa o le auala o le foai.
Na faamaonia e Mulipola o le tausaga e 2007 na ave ai lana talosaga i le kalapu lakapi a Letogo i Niu Sila mo se togiga, ma o lea ua tali mai.

“E faafetaia ai sui uma o le kalapu a lenei nuu i Niu Sila ona o le lotonuu moni ma le fai uso ma ua latou talia lelei le matou faatalauula atu”, na saunoa ai Mulipola i le tusitala.

O  le Aso Faraile na tea nei, aso 1 o Aperila 2011 na tauaao ai le togiga i le kalapu. Faaalia e Ulamai na mafua ona tuai tali mai i le talosaga ona o le taimi lea faato‘ā tau amata le kalapu lakapi i Niu Sila.

O suegatupe i po siva, ma pepa lulu sa faatau faapea foai a le kalapu faapea ana uo ma paaga na mafai ona faatau ai togiga, ma faguvai auā tasi lea vaega e sili ona manaomia.

O loo naunau le taitai o le kalapu i Samoa e faaauau pea le vavalalata o le sootaga o kalapu e lua e maua ai pea fesoasoani mo le atiina a‘e o le lakapi mo alo ma fanau o Letogo i Samoa.

Ua toatele nisi o alo ma fanau o le afioaga ua lauiloa i le lakapi ma sa i totonu foi o le Manu Samoa faapea le au lakapi a le atunuu o le Samoa-A.
O nisi o ia tama fanau a Letogo e aofia ai Muliaga Bryan Lima, Tupae Esera Pati, Kepi Faivaai, ma John Clarke.
O le au lakapi o le Samoa-A o loo iai Uaealesi Faatauvae ma Silipa Lealiifano. “Ua fetaui le aumai o togiga ma faguvai ae ua avea Muliaga Bryan ma faiaoga o le matou au tele o le Senior-A”, na saunoa ai Mulipola Ausetalia Titimaea.

O le tau o le foai e silia i le $8,000 tala Samoa. O le kalapu lakapi a Letogo i Niu Sila o loo seei ai Tologataua Tauiliili o le taitaifono, Teutupe o Ueligitone Li‘a, Failautusi o Mo‘e Fina‘i.
O ona sui e aofia ai Gasealii Tana, Rev Lemi Seumanu, Lemaota Mautagatamua, Faitonulelei Viliamu Pilimai.