E lē o faaitiitia le alofa mai pea ma le agaga fia fesoasoani o le malo Saina i lo tatou malo i Samoa, e pei ona toe saini ai foi le isi fesoasoani tele tau seleni, e 10 miliona i RMB Yuan a Saina, ae tusa lena ma le $3.835 miliona i tālā Samoa.
O le vavalalata lenei ma le sologa lelei o loo iai le faiga paaga a nei malo e lua, e pei ona silafia le tele o isi galuega tetele o fausaga o fale tetele a le malo ua mae‘a ona fausia ma nisi o loo faagasolo pea o latou fausaga, i le taulaga i Apia, i lalo lava o faigauo lelei nei a malo e lua.
E lē gata i tagata faigaluega o loo auina mai e galulue i nei fausaga tetele, ae o foai tau seleni e pei foi ona iai le foai tele ua toe sainia faatasi e le afioga i le Palemia o Samoa, ma le alii o loo avea ma amepasa o Saina i Samoa, His Excellency Zhao Weiping.
O lenei foai tupe e silia ma le 3 miliona tala Samoa, sa faatinoina le sainia aloaia mai, i le ofisa o le afioga i le alii Palemia, i le Eleele Fou.
O lenei foai tupe, ua tuuina mai e fesoasoani i le faatinoina o nisi foi galuega tetele poo poloketi ia ua uma ona taufai malilie uma i ai malo e lua o le a faagaioia.
Sa momoli le faafetai tele a le Palemia o Samoa, i Lana Afioga, le Amepasa o le malo tele o Saina, ma talosagaina ai foi le alii Amepasa ina ia faaoo atu le faafetai a le malo Samoa, i le faigamalo a lona atunuu i Beijing.
