E ui lava ina ua amata ona tau pe atu le manua sa afaina ai le tele o afioaga i le Mata Aleipata, ma lea faaitu o le atunuu, aemaise nisi vaega sa manua mitimiti ona o le mala faalenatura sa faafuasei ona toeesea ai soifua, atoa ai ma le faaleagaina o meatotino e oo lava i le tamaoaiga ma le siosiomaga.
Peitai e toe fafagu mai pea ma foliga e toe tu mai e pei o se ata faasolo pe a toe taua le igoa sunami poo le galulolo i soo se taimi.
Ae peitai o le toe taua pea o le galulolo (tsusami), ona o loo faaauau pea le alofa ma le agalelei tulai o tagata ma faalapotopotoga i Niu Sila, e ala i le foaia o meaalofa tau seleni ma isi.
O le tasi o faalapotopotoga mai le malo o Suetena (Sweden) ua faaigoaina o le Organisation Mundial Education Prescolar (OMEP), ma oloo iai sona lala i Niu Sila, o loo faaigoaina faapea World Organisation for Childhood Education.
O se faalapotopotoga tumaoti (Non-Government Organization) e fesoasoani mo le itu tau aoaoga i le vaega o fanauiti, e aofia ai aoga amata poo aoga faataitai.
O le lala i Kalaisetete o lea faalapotopotoga, sa latou foai se vaega tupe e tusa ma le $5,000 e fesoasoani ai mo le toe faaleleia o le faleaoga o le afioaga i Saleapaga, sa faaleagaina i le galulolo i le tausaga talu ai.
O galuega faagasolo ma le masani a lea faalapotopotoga, o le tuuina atu lea o ni fesoasoani tau seleni e lagolago ai nisi o aoga o loo faatuina i totonu o Niu Sila, ma le leai o se faamoemoe e toe penefiti i ni tupe maua mai.
O se tasi o tamafanau a Samoa o Poalaga Selma Scott, e aiga i se tasi foi alo o le atunuu le susuga ia Dr Alex Gunn e galue ai le vaega lea, o se fesootaiga vavalalata lea na mafua ai ona fiafia le vaega i Kalaiesetete e ofoina lea fesoasoani mai le taele o finagalo o le faatina o le faalapotopotoga i le lalolagi le OMEP.
O le iai o le afioga ia Olialii Gary Tuiletufuga i Niu Sila nei i le vaiaso talu ai, ua tauaaoina ane ai ma le tusi aloaia e momoli ai le seleni ma le mealofa mo le afioaga i Samoa.
E pei ona silafia o le afioga ia Olialii Gary Tuiletufuga, o se tasi o tamalii o le afioaga i Lepa, ae iai foi sootaga taua ma le afioaga i Saleapaga, ae tainane foi o se tama o le itumalo, la lea ua maua ai le avanoa e faaoo ai le fesoasoani mo se tulaga aloaia.
E pei ona taua e ui lava o le meaalofa sa tauaao ane i le aai i Kalaiesetete, ae peitai e pei ona faailo mai i le tusi sa tuuina mai i le tatou nusipepa, ma sa faamaonia foi e le afioga ia Oloialii i le ofisa nei, o se seleni tuufaatasi sa saunia e lala uma o le faalapotopotoga i Aukilani, Ueligitone, ma Kalaisetete.
O le faaiuga o le vaiaso na tea nei, na toe taliu ai le malaga a le afioga ia Tuiletufuga i Samoa, ma o le a tauaaoina ai foi ma lea tusi aloaia, mo le momolina o le mealofa tupe mo Saleapaga i Aleipata.
