O le toe faaleleia o alavai o loo felavasai solo i le eleele o le taulaga o Apia ua agai mai ai nei le fesoasoani a le Iuni o Europa lea foi e faaauau lava le fesoasoani mo le faaleleia o le suavai maua i afioaga i tua o Samoa.
O se tasi lenei o fesoasoani e tolu ua vaevae nei e le Iuni a Europa auā lava le faaleleia o le suavai maua i totonu o Samoa.
O le fesoasoani muamua lea foi ua oo atu i le faitau piliona le tau, lea ua silia i le ono (6) tausaga o faatino, o lea o loo ua faatautaia ai galuega i faatanoa vai, nofoaga e tapue ai le suavai aemaise o le ta‘iina o paipa mai i ia nofoaga ina ia soo uma afioaga i tua o Savaii ma Upolu i le suavai mamā.
O le Pulega o le Suavai o loo nafa ma le faatinoga o lea galuega tele.
O le isi fesoasoani ua lua i ai atina‘e tetele a le EU ua ave sa‘o lava i le Matagaluega o Tina ma Tamaitai, Atina‘e o Nuu ma Agafesootai i lona vaega o atina‘e o nuu.
O lea fesoasoani ua silia foi i le 50 miliona lona tau atoa, o loo faasoa atu ai le faaleleia o nofoaga o loo tapue ai le suavai ma le pulea o suavai taumafa auā afioaga e 51 o loo pulea saoloto lava e i latou o latou suavai taumafa.
O afioaga nei e le o i lalo o le vaavaaiga a le Malo ma o loo faagasolo i le taimi nei a‘oa‘oga ua faatautaia auā le a‘oa‘oina o le malosi o le nuu aemaise foi le afioaga atoa ina ia silafia le faatinoga o galuega e faaauau ai le faaleleia o le suavai maua aemaise o le pulea lelei o lea puna‘oa auā fanau a afioaga nei.
O le fesoasoani lona tolu la lenei ua vaavaai ai loa le Iuni o Europa i le talafatai o le taulaga ina ia mautinoa e mamā atoatoa le suavai maua i lenei itu o loo tumutumu ai le atunuu i Apia auā galuega aemaise o a‘oa‘oga ma isi nofoaga faitele.
Ua vaaia pea i le tele o tausaga ua tuanai le faigata o lenei vaega o le atunuu, le taulaga, ona o le ono aafia gofie o le suavai maua ona o isi foi ogapaipa felavasai solo i le eleele ua feaveai ai le suavai palapalā mo le toe faamamāina i Sogi aemaise o le tele lava o le mau faafitauli i le faasoaina o le suavai ona o le itu lea, ua toatele lava le atunuu ua faamautu ma nonofo ai i le talafatai o le taulaga.
Ua le gata la i le ogatotonu tonu o Apia ae ua faapea foi ona faaavanoa se tupe o lenei fesoasoani mulimuli mo le faamautu ai o nisi paipa auā le faatofutofusia o le suavai mo nofoaga ua tele ina nonofo ai tagata e pei o Vailele i fanua o le Malo ua faatau e le toatele o le mamalu o le atunuu.
O le suavai mamā e ta‘i atu i Manono-uta auā le mamalu o le motu o loo i le motu i tai, o le isi lea nofoaga ua taulai i ai lenei fesoasoani.
O le Afioga i le Sui Palemia le Minisita foi lea o Tagata Tafafao mai ma Fefaatauaiga, le Afioga Misa Telefoni na talia lea foai tele mai i le Iuni a Europa e pei ona sainilima ai ma le sui o le Iuni o Europa i Samoa nei.
O manaoga tāua lava nei faaletagata na ta‘ua e le afioga i le Sui Palemia e matuā moomia ai se fesoasoani, ma e le uma le faafetaia o le fesoasoani faifaipea a le Iuni o Europa i lea atina‘e tele auā le soifua manuia o tagatanuu o Samoa.
