O mafatiaga ua feagai nei ma le alii talavou o Ben Lei‘a o Satitoa Aleipata lea ua pe atoa le vaega pito i lalo o lona tino e amata mai i lona sulugatiti e oo i ona matiutiu vae, ua foai ai e le Iuni lakapi a Samoa se tupe e lima afe tala e fesoasoani ai i le tausiga o ia e lona aiga.
E pei ona silafia o mafatiaga na feagai ma le aiga ina ua faataotolia Ben i le falemai i Samoa nei, na mafua ai ona oso a‘e le loto alofa ma le agaga fia fesoasoani o le au lakapi a Olopeleki a Niu Sila ma faia ai se sailiga tupe ua mafai ona fausia ai se fale mo Ben faapea ma le ituaiga o nofoa faataavalevale e talafeagai tonu mo ona aafiaga.
O le tausaga ua mavae na faia ai lea sailigatupe ma e oo mai foi i le faaiuga o le tausaga na tea nei ua foai e le kalapu a le Malisi i Samoa se taavale e feaveai ai le alii o Ben.
O ia o se tasi o tama lakapi o le kalapu a le Malisi, ma o le vaitaimi tonu lenei o le tausaga ua mavae na aafia ai i se taaloga lakapi ma aafia ai lona maea-alio i se pu‘e malosi.
Na aafia o ia i le taimi tonu o loo tapena le malaga taamilo a le au lakapi a le Malisi e malaga atu i Niu Sila, ma o ona manu‘aga na lē mafai ai ona taunuu lona faamoemoe e malaga faatasi ma le ‘au.
Ua atoa i le masina o Ianuari o le tausaga nei le tausaga talu ona faataotolia lea alo talavou o le atunuu ua lē mafai ona toe atoatoa lona malosi.
O le susuga i le Pule Sili o le Iuni Lakapi a Samoa, le afioga ia Su‘a Peter Shuster faapea le Faiaoga Ulu o le ‘au lakapi sefululima a le atunuu, le Manu Samoa, le afioga Fuimaono Titimaea Tafua, o laua na fai ma sui o le iuni e molimoli atu le foai tau seleni mo le alii talavou ua faataotolia nei.
Faaalia foi e le aiga o Ben Lei‘a lo latou agaga faafetai e talisapaia ai lenei agalelei o le iuni lakapi i mafatiaga o le atalii.
