Fiu Malie e tuli ese se matai mai le nuu

Ua faaalia le faanoanoa o sui o le afioaga o Malie i le toe tolopo atu foi e le Faamasinoga o se mataupu faatatau i se alii o lea afioaga ua fiu faatonuga e aua nei toe solia le afioaga ae o le latou mau o loo ia faia lava.
Ua faalua ona oo atu le Pulega a Alii ma Faipule o Malie i le Faamasinoga Faaitumalo ina ia faia se latou faaiuga maumaututu faasaga ia …… ….. lea ua maea poloaiga a le Faamasinoga o Fanua ma Suafa e sa ona toe solia le afioaga ae o loo vaaia pea i lona aiga i Malie.
Faaalia e le sui o le Afioaga na faatalatalanoa i lenei mataupu, o lea ua toe oo mai i le faamasinoga ma o le vaiaso ua tuanai lea na toe tulai ai foi lenei alii i luma o le Faamasinoga ona o le tagi a le afioaga o loo solia lava e ….. le afioaga ma o loo vaaia pea i lona fale lea o loo iai lona toalua ma lana fanau.
O le taimi muamua na aumai ai lea mataupu i le Faamasinoga o Soligatulafono, o se tagi faapea foi a le afioaga. Na faatonuina le afioaga ina ia toe foi atu i le Faamasinoga pe afai e le usitai lava le ua molia aua sa nofo lava i totonu o le afioaga. Na faatonuina foi e le Faamasinoga Faaitumalo le alii lenei ina ia aua nei toe vaaia lona tino i le afioaga.
O le aumai faalua la o le mataupu i le Faamasinoga lea ua tetee ai loa …. … ma ia faapea mai e le o toe alu lava i lona aiga talu le faatonuga a le Faamasinoga Faaitumalo lea na fai talu ai. O se faamatalaga o loo matua teena e lenei alii.
O le masina la o Oketopa lea ua toe tolopo i ai le mataupu ma e toafa molimau a Leoleo poo le afioaga ua iai e faamautu ai le latou tagi. O le atugaluga o le sui lea o le afioaga o ….. talu ai o Oketopa e mamao tele lea ae o loo mautu le latou mau o loo vaaia lava lenei alii i totonu o Malie.
Na mafua le faatulai ese ma le afioaga ona o le le usitaia e lenei alii o se faasalaga a le nuu i lo latou faalalo lea o se meaituaolo ma nisi alii o le afioaga. Na fai uma sala a le isi vaega na faasala faatasi ma ….. sei vagana ai le ua molia e lei faia sana sala. O le le usitaia la o le sala lea na faatulai ese ai loa mo se vaitaimi peitai na toe ave e le alii lenei le pulega a alii ma faipule i le Faamasinoga o Fanua ma Suafa, ona o lana mau e iai lana aia tatau e nofo ai i totonu o le afioaga.
O le faaiuga a le Faamasinoga o Fanua ma Suafa, ua le usitaia le faatonuga a le nuu ma na mautinoa le agasala na fai e lenei alii. O lea la na poloaina ai e le Faamasinoga o Fanua ma Suafa lenei alii e tulai ese ma le afioaga mo se taimi le tumau. Le faaiuga la lea ua faalua nei ona aumai i le isi Faamasinoga lea o Soligatulafono ae o lea la ua toe tolopo atu ia Oketopa.
O loo iai foi se isi moliaga o lenei lava alii na tulai mai i totonu o le taimi o le poloaiga a le Faamasinoga o Fanua ma Suafa ae o se tuuaiga e faatatau i le umia ma le taumafai e faatau atu le laau faasaina o le mariuana.