O ni manatu e fausia i se loto e tasi, e faigofie ona maua le iuga. Ua tasi le ta‘ū e pei o le fetalaiga i le Vaimagalo auā ua mae‘a paniniu le soalaupuleina o le faamoemoe ma autasi loto ma finagalo o tupu ma tamalii, faletua ma tausi faapea sui o aufaipese i se uluai fonotaga muamua i le po o le Aso Toonai aso 8 o Iuni.
O le mae‘a ai ona ave faameaalofa o le taavale sa foai fua mo le community Samoa i le tausaga ua tuanai, na toe tonu ai i le manatu o le alii pule sili o le faletaavale o le Primoz Motors e toe oomi pea le manuia lea e faaui atu ai se agaga faafetai ona o le lagolago o Samoa i Brisbane i lana auaunaga.
Na toe fetuunai manuao ma a‘e ai se tofā e talafeauga le faasafua i ekalesia e ala i se tauvaga pese lotu ma faia faaailoga tupe, nai lo le toe ave foi o se taavale ae laki ai na o le tagata e toatasi.
Na logoina i luga o galugalu ma peau o le ea mo aulotu e 12 sa fia auai peitai sa lei mautinoa le ‘auga na lē pa‘au atu ai sui o ia aufaipese e pei ona faaulu mai.
E na o le fitu aufaipese ua mautinoa ua alo atu nei mo lea tauvaga tele e faatautaia e le leitio o le Penina o Asuisui i le masina o Aukuso, faatupeina faaailoga e le Primoz Motors.
O le tulaga muamua e $3000.00; (2) $2000.00 (3) $1000.00 (4) $500.00 ma isi faailoga faaopoopo mo isi aufaipese. Ua tapenaina foi e le tofa ia Poulava ma le tausi ia Lorna Matautia (Uncle Sam’s Take Away) se faamalositino faapea le Digicel lea ua ofoina mai foi lana fesoasoani.
E tele na‘uā kamupani o loo ua tuu mai o latou tau‘au e fia pulupululima i lea aso taupoina o le a fofogaina lava i se taimi o i luma.
E lē o maotua ma mamafa ni aiaiga o lea tauvaga auā o se po fiafia e feiloai ai Samoa i Brisbane mo i latou lava e avanoa, aemaise ai le faafofoga i nisi nei o aufaipese aave o latou tala i le talenia ma le siufofoga lelei o tagata uma.
