Finau Tuilaepa e faatu se komiti e suesueina tusitala

Na vave ona malaga nisi tusitala i nuu ua aafia tele i le galulolo e fesilisili i aiga poo lelei le faaooina atu o fesoasoani o loo tufa e le Malo e ala i le komiti o faalavelave faafuasei, ina ua agiga ma salalau se lipoti na taua ai se faanoanoaga o se tamaitai Samoa mai Niu Sila i le lē oo o fesoasoani i nisi o aiga o loo mafatia.
Sa faasalalau e le nusipepa o le Samoa Observer se lipoti e afua i se talanoaga ma le sui Pulenuu o Porirua, o Litia Ah Hoi na taua ai ia faaletonu.
O le lipoti lea na mafua ai ona faailoa ane i se vaega o tusitala na maua le avanoa i le alii Palemia, Susuga Tuilaepa L Sailele Malielegaoi, le finagalo o le taitai o le Malo ua tatau ona faatu se komiti e suesue ai tusitala e faia lipoti le sa‘o.
“Fea o iai le au tusitala matutua na e feei pea o latou e puipuia le saolotoga, ae le faatu se komiti e suesue ai tusitala e faia ni lipoti le moni? O atunuu i fafo e pei o Ausetalia ma Niu Sila e iai komiti faapena”, o se vaega o le finagalo o le alii Palemia na faateia ai nisi tusitala. Fai mai le taitai o le Malo e le sa‘o lipoti ua faia i le le maua e nisi o fesoasoani, atoa ai ma tala salatua ua faatau nisi o taumafa o fesoasoani e pei o taga araisa.
Na amata folasia se finagalo o le taitai o le Malo i ia lipoti, ina ua aliae se isi lipoti na faasalalau e nusipepa na taua ai le iai o se gaioiga na taumafai ai ni tagata o loo tufaina fesoasoani e faatau ni taga araisa i se faleoloa.
“Vaai outou masalo pe toatasi lava se tagata o faia sea tulaga, ae a alu atu nei tou lipoti i fafo ona faapea lea o tagata ma atunuu o loo alolofa mai, o tagata uma lava o loo faia ni uiga le lelei faapena; se tuutuu i le loloto le tofā”, o se finagalo o Tuilaepa.
Faaalia e le Palemia e ao i tusitala ona o e suesue lelei ia faamatalaga ma maua tonu tagata o faia ina ia maua ai le faamaoniga.
O le finagalo o le Palemia e mafua i le taunuuga o se suesuega a le komiti o faalavelave faafuasei na iloa ai e le moni ia faamatalaga ua salalau solo, i le talitonuga o Tuilaepa o ni tala ua faatupu e nisi tagata ae le moni.
O le lua o vaiaso talu ona tuanai le galulolo sa faailoa ane ai i le tusitala o lenei nusipepa e se sui o le komiti o le DMO (Disaster Management Office) e galue i se matagaluega a le Malo, e iai lipoti ua oo atu ua faailoa atu ai e tagata le tutupu o faaletonu i le faatau e nisi o tagata o taumafa e pei o taga araisa. Sa musu lea sui o le DMO e faailoa ane nuu ma itumalo ua taua i lipoti na oo atu ai le faia o lea tulaga. Na musu foi le sui o le DMO e faasalalau lona suafa pe faailoa o ia, ona e fefe i iloa e taitai o le DMO ona tuuaia lea o ia i le tuuina atu o ni faamatalaga faapea i tusitala. E le faailoaina e le tusitala lea sui ona o le puipuimalu i se aafiaga pe a iloa.
Faaalia e nisi o tusitala matutua e leai se isi e faitioina le finagalo o le alii Palemia aua o se mea tatau le faatu o se komiti e suesueina tusitala ma faitioga faasaga i le galuega a le au faasalalau. Ua maea ona taoto se fuafuaga a le asosi o tusitala i Samoa le JAWS e faatu ai se komiti, peitai o loo tatali pea i se finagalo fulisia o tino tau faasalalauga uma i le atunuu e lagolagoina lea fuafuaga ona faatoa mafai lea ona faatino.
O faiga ia ua maea ona faatu e isi atunuu mo le tausisia o pulega lelei ma le faimeatonu.