“Ua iai le faaiuga a le Kapeneta na aumai i le masina o Ianuari o le tausaga nei, o loo manino mai ai o le fale o se meatotino a le matagaluega o leoleo”. O le finagalo lea o le sui Komesina le afioga Afamasaga Micahel Soonalole ina ua tapa sona finagalo e tusa ai ma se tasi o maota tuai o le matagaluega sa iai le ofisa o le komesina ma nisi ofisa o le matagaluega i tausaga ua mavae, ae na faaleagaina i le afā o Eveni i le masina o Tesema o le tausaga 2012.
Na tutu ai lava le fale e lei toe faaleleia ona sa iai le fuafuaga a le Matagaluega e tuu i lalo ae toe fausia. O le taimi lea o loo faaaogā e le faalapotopotoga o le Toomaga mo ē Puapuagatia na o se vaega i lalo i le pito i uta mo ana galuega.
Mai lena taimi atoa e lei toe faaleleia ai le fale, na agai loa le Toomaga ma saili fesoasoani i le Malo o Iapani ma maua ai le seleni na latou faalelei ai le maota tuai i le faamoemoe e faatino ai se tasi o ana auaunaga o le tausia ma vaaia ai tina ma‘itaga ua sauaina.
O lea fuafuaga na amata ai loa ona tulai mai feteenaiga ma finauga i le va o le Toomaga ma le pulega o le matagaluega o leoleo. Peitai o Ianuari o le tausaga nei na faailoa ai i se faaiuga a le Kapeneta, o le fale o se meatotino a le matagaluega o leoleo, ae e faaauau pea ona faaaogā e le Toomaga.
O loo feteenai pea lava itu e lua i le faauigaga o le iuga a le Kapeneta. O le mau a le matagaluega ua na o le vaega sa iai le Toomaga e tumau pea ona latou faaaogāina, ae o le fale atoa e faaaogā e leoleo mo ana galuega o aso uma.
O se feiloaiga a le Peresetene o le Toomaga ma le faatamā o le faalapotopotoga sa auai ma le sui Komesina le afioga Afamasaga Michael sa talanoaina ai le mataupu. Peitai ua faailoa mai e le sui Komesina e lei maua se tonu mautu ma e toe faatalatalanoa lava le mataupu lenei a o lei tatalaina aloaia lona faafouga i le masina nei o Mati, o le taimi tonu o le a faailoga ai le sefulu tausaga talu ona faatuina le Toomaga mo ē Puapuagatia.Faaalia e le peresetene o le Toomaga le faletua o Siliniu Lina Chang, o le faaiuga a le Kapeneta ua tuuina atu ai le fale atoa e faaaogā e le faalapotopotoga i se aiaiga tau lisi. E lei faamatalaina e le Peresetene poo le lisi i lalo o le matagaluega o leoleo pe lisi mai i le Malo.
“Ua uma ona matou feiloai ma ua faailoa i le sui Komesina le taotoga o le mataupu ae ou te lē iloa poo le ā le isi mafuaaga ua saga faaumiumi ai le matou mataupu”. O se molimau faatuatuaina ua ia faailoa o le masina nei e tapena atu ai se isi ofisa o le matagaluega o leoleo i le fale o loo finau ai nei.
Peitai o le faamatalaga mai le peresetene o loo faaalia ai, e lē tatau ona iai se tulaga faapea ona o loo manino lelei le iuga a le Kapeneta. Ina ua toe fesiligia le sui Komesina na ia faaalia ai, o le faaiuga a le Kapeneta o loo manino ae o le a toe soalaupule atili le mataupu pe a iai se isi feiloaiga o le a faia.
O ata tuai o le amataga mai o le matagaluega o leoleo i taimi o pulega a Siamani o loo iai ata o fale na amata ai, lea e aofia ai ma le fale fogafale lua o loo finau ai nei itu e lua, ma o se fale na toe faafou ma fausia i taimi o pulega a Niu Sila i Samoa. O uluai Komesina o le matagaluega o leoleo sa faamautu o latou ofisa i le fale lea, e aofia ai le alii Komesina o Alphonso Phillips, sosoo ai ma Sir Angus Sharp, le afioga Lavea Lio, ma Saunoamaalii Sonny Schuster.
O le isi fogafale lua fou e lē mamao ma le maota lea na toe siitia i ai le ofisa o le Komesina lea sa faaauau i ai le ofisa o Sonny Schuster, sosoo ai ma Samau Timani Samau, le afioga Galuvao Tanielu Galuvao, ma Asi Semisi Blakelock.
O le maota fou ua iai nei o leoleo na fausia e le Malo Ausetalia na amata ona galue ai le Komesina, susuga Papalii Lorenese Neru, afioga Lilomaiava Fou Taioalo lea na faamuta lona taimi i se suesuega a se komisi suesue. O loo avanoa nei le tofiga Komesina ma o loo sailia se tasi i le taimi nei.
