E toaono ni alii taaalo lakapi i fafo a le Manu Samoa ua fai nei i ai finauga a le Iuni lakapi a Samoa ma le Pulega o le lakapi faavaomalo le IRB, ona ua faasā e a latou kalapu ona agai ane e tausinio i le Taamilosaga lea ua sauni atu le Manu Samoa e amata i le Hemisphere i Matu.
O se tusi ua tuu atu e le Ofisa sili a le Iuni Lakapi a Samoa le susuga Fred Amoa i le IRB e faaaogā le vaega e iva o tulafono a le pulega o lakapi e faamatuu atu ai tama taaalo nei e toaono mo ia taaloga.
O tuutuuga e pei ona ta‘ua i vaega o le tulafono a le IRB ua faaalia ai e iai le taimi e mafai ai ona faia lea tulaga, ae e iai foi taimi o le tausaga e lē mafai ai ma ona pau lava taamilosaga mautu e lē mafai ona taofia ai tama taaalo e tausinio mo ‘au a o latou atunuu, o le taamilosaga lea o le ipu o le lalolagi, ma le sailiga o ‘au e au i le ipu o le lalolagi, e lē gata i lea, o taamilosaga mo le olimipeka ma taamilosaga a ‘au a le Liona.
E na o le tolu lava aso e sauni ai le ‘au a Samoa i Peretania a o lei amata ana taaloga o lea taamilosaga, ma ua ta‘ua e Stephen Betham le alii faiaoga o le Manu Samoa, e matuā lē mafai lava ona faatino se sauniuniga lelei pe a tuai atu i latou nei pe lē agai atu foi.
O le toaono ua aafia i taofiga a a latou kalapu e aofia ai i latou i le iuni a Farani, o Daniel Leo, Ole Avei, Census Johnston ma Joe Tekori.
O le isi toalua o George Pisi o loo konekarate i le kalapu a Northampton Saints Club i Egelani ma Seilala Mapusua o loo taalo mo se tasi o kalapu i Iapani.
