Finau sa tatau ona molia le Sui Palemia ma se Minisita Lagolago

O le taofia e leoleo o le taavale a le minisita lagolago le afioga Muagututagata Peter Ah Him i se tasi o po tusa ua lua nei vaiaso talu ai, ma faatonuina e feula le masini e sailia ai le maualuga o le avamalosi sa ia taumafaina, na sosolo atu ai ma le taavale sa malaga ai le sui palemia e faapea sa mulimuli atu i le taavale a le minisita lagolago, ma faatonu leoleo e tuu le minisita lagolago e alu.
Na mafua ona taofi e leoleo le taavale a Muagututagata ona sa liliutū pe U-Turn i luma o le fale fou o le NPF ma toe agai i Sasa‘e o le taulaga ae e lē faatagaina i le tulafono o taavaleafi ona liliu ai se taavale i luma i lea vaega o le alatele. Fai mai se leoleo o le vaega o taavaleafi sa latou sosogi i le manogi pia o le alii minisita lagolago.
O loo faamatalaina i se lipoti a le upega tafailagi o le Talamuaonline se finagalo o le sui Komesina, o ia foi o le sooupu o le matagaluega o leoleo ma falepuipui le tofa Fauono Talalelei Tapu, o loo ia ta‘ua ai sa tatau ona molia le sui palemia le afioga Fonotoe Nuafesili Pierre Lauofo i le moliaga o le faalavelave i tiute o leoleo, poo le moliaga foi o le taumafai e taofi le faia o le amiotonu.
Ina ua toe tuliloaina le sooupu o le matagaluega o leoleo i lona finagalo, ae sa ia tetee e lei faia sana faamatalaga faapea. “O a‘u ou te lei iai i le taimi o le mataupu ona sa ou malaga i fafo, ae o la‘u tala na fai o gaioiga faapea e tulai mai e iai moliaga a leoleo e mafai ona molia ai se tasi”, o le saunoaga lea a Fauono.
Na faaalia foi e Fauono ua na o le Komesina e faia le faaiuga i le molia o se tasi e pei o i latou o loo avea ma taitai o le Malo i minisita e aofia ai le sui palemia ma isi tofiga maualuluga. O ia tiute o loo tauaveina nei e le tasi o komesina lagolago o loo sui komesina le afioga Afamasaga Michael Soonalole.
E lei manuia taumafaiga i le sui komesina mo sona finagalo ona o taimi uma e valaau atu ai mo se talanoaga i le telefoni, o loo pisi i ana fonotaga ma isi tiute.
E toalua ni alii leoleo o le vaega o taavaleafi sa tiute i le po tonu na tulai mai ai lea mataupu. Sa la talanoa mai ma faailoa e sa‘o le mea na tupu ma ua la faanoanoa tele i le tulaga na aliali mai ma o le laua talitonuga e tatau ona faia ni moliaga faasolitulafono.
O sailiga i le fia maua o le sui palemia mo sona finagalo e lei manuia. O le faamatalaga a lana failautusi o loo malaga i fafo Fonotoe i ni fonotaga ma e faato‘ā toe taliu i le atunuu i le faaiuga o le masina nei.
E lei manuia sailiga i le fia maua o Muagututagata Peter Ah Him. O le a tuliloaina pea lenei mataupu.

Afioga i le sui Palemia, Fonotoe Nuafesili Pierre Lauofo Afioga i le Minisita Lagolago, Muagututagata Peter Ah Him