“O la‘u toe galuega lea ua faailoa mai e le Alii”…Faamanatu Nielsen
O loo faataotolia i le numera tigaina le HDU i le maota gasegase o Tupua Tamasese Meaole i Motootua le Peresitene o le Sosaiete a alii ma tamaitai tausi soifua a Samoa, le faletua o Faamanatu Nielsen, ae na ia saili mai lava le tusitala o lenei lipoti i lona fia faailoa i le atunuu o mafatiaga o loo nofo ma ia.
“Ou te tatalo atu i lau afioga i le Palemia se‘i silasila ane pe aisea ua tuai ai ona maua le siitaga o nai tausi soifua”.
O le feiloaiga ma le peresitene e lei fuafuaina, ae na saputu mai valaau ma feau tusitusia i le telefoni feaveai ma le poloai o loo fia talanoa o ia i le tusitala ona o se mataupu tāua.
E ui ina sa tigaina lona gasegase ae sa taumafai pea e talanoa mai ma faaleo lona mafatiaga. “Ua ou lē iloa, ua uma atu Iulai, lenei ua alu Setema e lei maua lava le siitaga, ae ua ua uma ona pasia e le Board”.
Na faamatala Faamanatu sa fai lana miti a o taoto i le falemai, ma o le feau ua aumai e le Alii ia te ia, ia alofa le Malo ma fai se faaiuga i le tuai maua o le siitaga o totogi. “O le feau lena mai le Alii mo a‘u, ma o la‘u galuega mulimuli lenei ae ou te lei oti”.
Sa soisoi le peresitene e foliga o loo faamalosiau pea i le talanoaga ma le tusitala ae sa iloa lelei lava lona mafatia i lona gasegase.
E ui ina aumai sona lagona faamama‘i ae o lana faamatalaga, afai ae manuia ma toe maua lona malosi, ua sauni e valaau se fono tele a le sosaiete e talanoaina ai le mataupu. “Ioe o la‘u fuafuaga lena pe a toe maua so‘u malosi”.
E lei manuia sailiga mo se finagalo o le pulega o le vaega o le matagaluega o le soifua maloloina o loo nafa ma le mataupu i le siitaga o totogi o tausi soifua.
Peitai ua faaalia e le peresitene o le la feiloaiga ma le taitaifono o le Komiti Faafoe o loo pulea le matagaluega, na faailoa atu ai ua mae‘a ona pasia e le Malo le siitaga ma le vaegatupe e faatino ai e pei ona fuafua e amata maua ia Iulai o le tausaga nei.
O le faatulagaga foi o le galuega ma le auaunaga faatausi soifua poo le structure na faaalia e le peresitene ua pasia ma ua tatau ona i totonu o le faatulagaga atoa o le matagaluega.
“Ua ou lē iloa lava pe aisea ua faatuai ai lenei mataupu, ae afai o feita i le maualuga o le siitaga, toe tuu ifo teisi i lalo ae ia tatau lava ona maua”.
O se tasi o mafatiaga o loo nofo ma le peresitene o le fono i mataupu tau i faama‘i lē pipisi poo Non Communicable Diseases poo NCD lea e usuia i Niu Ioka i Amerika.
O se fonotaga tāua o le a soalaupule ai le tulaga ua oo i ai atunuu o le lalolagi ma faama‘i lē pipisi. Peitai na faaalia e Faamanatu, ua mafatia ona o le lē amanaia o le auaunaga faatausi soifua i le usugafono a Samoa, lea e na o le Minisita o le a malaga faatasi ai ma le Pule Sili o le Matagaluega o le Soifua Maloloina, ae leai se tausi soifua.
Saunoa le peresitene o se fono tāua ma e tatau ona malaga se tausi soifua aemaise i latou ua iai le tomai a‘oa‘oina lelei e silafia ai gasegase lē pipisi.
