E pei ona sa lipotia muamua i le tautua a le Samoa Times se suiga ua faatinoina e le malo tele o Ausetalia mo visa o tagatānuu o Niu Sila o loo malaga mai e nofo mau i Ausetalia, lea na pasia ma amata faamamalu mai le tausaga e 2001. Peitai o loo maitauina pea le faaopoopo i ai o isi aiaiga ma tuutuuga i lea tausaga ma lea tausaga, ua atili ai ona faigata le soifuaga.
Ua avea nei tuutuuga ma aiaiga ua faamalosia ai pea le finau a tagata Pasefika o aumau i le aai o Melepone e pei ona amata mai e le faalapotopotoga o le Leo o le Pasefika (Voice of the Pacific) ia Iuni o le tausaga na tea nei.
I le taimi nei ua mafai ona maua le lagolago mai a nisi o faalapotopotoga a tagata Pasefika o i le aai o Sini, ma o loo iai le faamoemoe o se taimi o lata mai e maua ai se feiloaiga ma nisi o faalapotopotoga i le aai o Perisipeni, ina ia malosi atili ai le finau.
Na fautuaina e nisi o sui faipule i se feiloaiga ma le Leo o le Pasefika, ina ia faasalafa le mataupu ma avea o se finau a tagata Pasefika mai aai tetele uma o Ausetalia atoa, ona malosi ai lea ma atonu e ono vave ai ona amanaia e le faigamalo o iai nei.
O le Aso Toonai la na tea nei na faataunuu ai se polokalame fesoasoani (Workshop) e tau faamalamalama ai nisi o fesoasoani e mafai ona maua mai le ofisa o le Immigration, ma le ofisa o le Centerlink. Sa auai i le faamoemoe ni sui mai ia ofisa o le malo lea na maitauina lo latou lava papale i le taliina o le tele o fesili na tu‘i ai latou e le paia ma le mamalu sa auai, o le toatele lava o ē na potopoto o le mamalu o Samoa, o nai tagata Maoli, o Fiti, Toga ma isi atumotu o le Pasefika.
O se tasi o itu matagofie na tulai mai i le Aso Toonai, o le tuutuu tau‘au mai o tagatānuu eseese, ua fia fai ma sui e momoli so latou leo ina ia malosi atili ai le finau. O le faamoemoe autū lava, ina ia malosiau i le tino atoa ma le silafia le finauina o lenei faafitauli ua tulai mai ma feagai ma o tatou tagata.
Atonu e lē mafai ona toe suia le tulafono ua pasiaina, ae o le finau, ina ia maua ni aiaiga talafeagai, e puipuia ai le aiā tatau a tagata Pasefika lea ua fememeai ona o suiga; o nisi o alo ma fanau a aiga o aafia i nei suiga, e matuā lē manino lava se lumanai manuia ona o aiaiga o loo iai. E faamoemoe pea i le faatasi mai o le Tapaau i le lagi, e maua ai le lototele ma le malosi e faaauau ai pea le finau.
