Finau pea Siumu i ona eleele

Ua lē manuia le talosaga a Siumu i ona eleele ina ua faatumauina le manumalo o le finauga a le Loia Sili a le Malo e taofi ma faaleaoga le tagi mai le oo atu e suesueina i le Faamasinoga Maualuga poo le strike out motion.

Ae lē o faavaivai ai Siumu aemaise matai o le nuu ma le itumalo o loo lotolotoi i le finauina o le aveesea faamalosi o se vaega tele o o latou fanua o loo i tua maota o le itumalo.

O le vaitau o pulega a Siamani na aveesea ai ia eleele ma o le mau sa finau ai le itu tagi, na ave faamalosia fanua e aunoa ma se silafia poo se ioega a le itumalo.

Ua faaalia e se matai o Siumu ua lē finagalo e faailoa lona suafa, o le amataga o le masina fou o Novema o le a toe feiloai ai i latou ma le loia sa tauaveina le mataupu ona o loo iai le isi vaega o le a sui i ai le finauga. Ta‘ua e lea matai o le a tuutuu mai i luma le finauga i le vaitaimi na vaevae ai eleele ma faatau ese e le Malo.

O le tausaga lea e 1965, e tusa lea ma le lua tausaga talu ona tutoatasi le atunuu mai pulega faakolone a Niu Sila i le tuanai o pulega a Peretania ma le Malo o Siamani.

O le finauga a le Loia Sili e taofia ma faaleaogaina le finauga a Siumu sa faavae i le iuga a le faamasinoga i le tagi a alii ma faipule o Vailoa Palauli ma le kamupani o Nelesoni poo O.F.Nelson lea sa finau ai lea afioaga o se vaega o o latou eleele ua aveesea faagaoi e le kamupani.

Peitai na aumai le faaiuga a le Faamasinoga Maualuga ma faamautu foi e le Faamasinoga o Talosaga Apili, o eleele sa finau ai sa faamatuu ese ma faatau e tusa ai ma ala faaletulafono i ona po o pulega a Siamani.

O le faavae foi lea o le faaiuga ua aumai i le mataupu i eleele o Siumu lea ua apo ma faaaogā ai e le Faamasinoga o Talosaga Apili le faaiuga lea i le va o alii ma faipule o Vailoa Palauli ma le kamupani a Nelesoni.

O loo ilitata pea le finagalo o se tasi o matai o Siumu le afioga Tapusalaia Laumatia ona o lona finagalo sa manao le alii Palemia e ave le mataupu a Siumu i le faamasinoga, ae o lea ua toe finau le Malo e taofi.

“E ese le fai mai e ave i le faamasinoga ae o lea foi ua toe mananao e taofiofi ma faasāsā Siumu. Talosia o loo sisila mai fofoga alofa o le Tama i le lagi na te faailoa mai se tali mo Siumu ma ona eleele ua aveesea faamalosi”. O se finagalo lea o Tapusalaia o se matai Siumu e alaala i Amerika Samoa.