E lē o nofonofo le pulega o le kamupani o le Samoa Solar Power Company Limited, i le faia pea o feutanaiga ma nisi o ana paaga faapisinisi mo le maua o le latou lagolago tau seleni e faatino ai le fausia o nofoaga e gaosi ai le eletise taugofie e maua mai le malosi o ave o le lā. Ua faailoa lea tulaga e le taitaifono o le komiti faafoe o le kamupani le Afioga Oloipola Terrence Betham, ina ua solomuli se tasi o paaga faapisinisi mai Ausetalia.
Peitai e iai se isi paaga poo se investor ua faatalanoa i le taimi nei, ma ua toe tuutuu atu foi le agaga o le paaga mai Ausetalia sa faamaamulu.
Ua faailoa mai foi e le taitaifono faatoa fā masina talu ona iai le ioega a le Malo e faatino loa se taumafaiga faapenei i le atunuu, ae o loo televave gaioiga a le latou kamupani e toe saili nisi paaga faipisinisi ma le faamoemoe e tatau ona tino mai ma mae‘a i le tausaga e 2014.
Ua faaalia e Oloipola e leai ma se sene apa a le Malo o tuuina atu i le latou taumafaiga, e oo foi i se faamaoniga a le Malo mo se nonogatupe e faaono faia e le kamupani i se faletupe i le atunuu.
O lona uiga e pei ona saunoa le taitaifono, e pa‘ū uma faaletonu ma mafatiaga i tumuai o le kamupani pe a iai ni pefea e aliali mai.
A oo ina tino mai le taumafaiga ua ta‘utino le taitaifono, o le a maua e Samoa se eletise sili ona taugofie, ae sa ia lē mafai ona faailoa pe fia se tau faataitai o loo silasila i ai le kamupani.
O le fuafuaga o loo iai e maua le 4 mekauati o le eletise e gaosi e lea kamupani, ma o le a sili atu ai Samoa nai lo Tonga ma Tokelau ua iai le malosiaga tau eletise e maua mai le malosi o ave o le lā le sola power.
O le tasi o vaega mataina pe a manuia lea atina‘e, o le puipuia o le siosiomaga o le atunuu, ona e saogalemu gaioiga uma mo le gaosia o le eletise mai le lā, pe a faatusa i le eletise o loo gaosia ma maua mai i le suauu kiso o loo aumai mai fafo.
O le mafuaaga foi lea e taugata ai le eletise i le taimi nei e pei ona saunoa Oloipola. O le a faatau e le Samoa Solar Limited lana eletise i le EPC ona faasoasoa ai lea i le atunuu, peitai o le a pa‘ū lava le tau mo tagata lautele, nai lo le tau o le eletise o loo iai nei.
