O loo finau malosi pea le faalapotopotoga o loo alagaina le tetee atu i masini ma nofoaga o taaloga peletupe, le Problem Gambling Foundation of New Zealand. O le Aso Lua, aso 5 o Mati na savalia ai e lenei faalapotopotoga le aai o Aukilani e agai atu i le nofoaga o le Pulega a Aukilani, e momoli i ai le sainigalima a le tusa ma le 9,061 a i latou uma o loo tetee i le faatulaga ai o nofoaga ma masini poka i totonu o Aukilani.
E tusa ma le 8,000 saini na taumafai lenei faalapotopotoga e maua, ae o se itu sili ona faafiafiaina ai ina ua silia mamao le aofai o i latou na sainilima mai e faaleo ai lo latou matuā teena o nei fuafuaga i taaloga faitupe, lea e iai le talitonuga, o se tasi o mafuaaga ua faateteleina ai le soifuaga mativa ma le tele o aiga malepelepe ma fanau ua tuulafoaia, ona o mātua ua pulea atoa o latou olaga e nei taaloga faitupe.
E toatele foi faafeagaiga o loo tutū malosi e fesoasoani atu i le umanaia o le feau taumomoli a nei faalapotopotoga, aemaise foi i totonu o aulotu Samoa ma isi lotu Pasefika, ua aofia ai lava lenei le talanoaina o lenei mala ia latou mataupu o loo laugaina.
O le aso 1 o Setema ua faatulaga o le a faatāua ai le taofia o le taalo poka poo taaloga faipoka i totonu o le atunuu.
O le a logologo puialii mai lea lenei faalapotopotoga, i le mamalu o le atunuu, i le tulaga e oo i ai le iuga o le sainigalima ua tuuina atu i le Pulega.
