Finau ma gasegase ae ua aulia lona 90 tausaga

 O le tamā matua le susuga Sili Peleti Saena Sili ua atoa lona 90 tausaga o le soifua ma lona faletua le tina o Mele Purcell Sili Saena
O le tamā matua le susuga Sili Peleti Saena Sili ua atoa lona 90 tausaga o le soifua ma lona faletua le tina o Mele Purcell Sili Saena

O le soifua galue o le tamā matua le susuga Sili Peleti Saena sa molimau se tasi o ona alo tamaitai o se tagata galue malosi ma galue punouai, auā sa na’o ia e faigaluega e tausi ai i latou e toavalu o lana fanau.

O le tamā matua, o ia o le tuaa o se tasi o tamafanau sa ta’uta’ua lana taalo o se tama o le Manu Samoa, le susuga Filipo Saena ua suafa matai i le Matamua ma le Pauli, faapea le suafa Falepauga i Moataa. O le Aso Toonai ua mavae atu nei na faailoga ai le atoaga o le 90 tausaga o le soifua o Sili Peleti Saena.

O le molimau a lona faletua le tina o Mele, o se mafutaga faigata sa feagai ma laua ma le tamā ia Sili ona e lima vaivai ae sa taumafai e ave le fanau i le a’oga ae ua oo mai nei ua faamautu le toatele i Niu Sila ma Ausetalia ma ua siitia ai ma le atina’e o le tamaoaiga o le fanau. Na molimau foi le alo tamaitai o Lizzy Tanuvasa e aumau i Ausetalia ma lona aiga e tele gasegase sa feagai ma le tamā ia Sili ae o le alofa o le Atua ua maua ai pea le mafutaga ma ia. O le tausiga foi oo latou mātua o se mea silisili lea ia i latou o le fanau.

 O nisi o fanau ma aiga sa molimauina le atoaga o le 90 tausaga o le tamā matua o Sili Peleti Saena
O nisi o fanau ma aiga sa molimauina le atoaga o le 90 tausaga o le tamā matua o Sili Peleti Saena

O se tamā e alofagia e le aiga o lona faletua sa mau paolo ai i le tele o tausaga o lona malosi e fua i molimau a nisi o le aiga i le aso na faamanatu ai lona aso soifua ua 90 ai ona tausaga. Sa soifua a’e i lona aiga i Sapulu i Salelologa ma o lona soifua talavou na faaipoipo ai ma le tina o Mele ma faamautu ai i lona aiga i Sapulu lea na maua o la alo e toatolu. Peitai sa sailiili matagi pea i la’ua mo le lumanai o le fanau ma faapea ona malaga ai i Upolu ma faamautu loa i le aiga o lona tausi i Moataa lea na soifua a’e ai le isi toalima o le fanau.

Na molimau le tina o Mele o ia e lē manao e faamanatu sona aso soifua ma e pau lava o ia, seia vagana le tamā o le aiga sa manao e faamanatu.

O le fanau na malaga mai fafo auā le faamanatuina o le aso soifua o le latou tamā. O aiga o Sili ma Mele ma fanau a uso ma tuagane sa faapea foi ona auai ma sa matagofie ai le faamoemoe.

O le faamanatuina o le 90 tausaga o le susuga Sili Peleti Saena sa faia lava i lo latou aiga i Moataa ma sa faatumulia i aiga faapea nisi o malo valaaulia. O le sauniga lotu sa ta’ita’ia e le susuga i le A’oa’o Fesoasoani le afioga Tupuola Pauli Toetu  Tuia.

O upu o le faafetai i le Atua na autu iai le feau faaleagaga na molimoli e le susuga i le A’oa’o Fesoasoani ona o tausaga e ivasefulu ua foai e le Atua i le tamā matua, auā e leai se isi na iluilu talutalu e aulia ia tausaga e tele auā o le pule faasoifua a le Atua e tutasi. O le fiafia ma le taumafataga felanulanuai na salani ai le faamanatuina o le aso soifua o le tamā matua.

Manuia lou aso soifua Sili ma ia toe maua nisi tausaga se tele e mafuta  ai ma le faletua, le nofoaalo ma aiga uma. O le tamā matua o Sili ma le faletua o Mele e faamautu i Niu Sila ma se vaega o le aiga ae fai ma asiasi i Samoa o loo iai le isi vaega o le fanau ma le aiga atoa.

O le susuga Matamua Falepauga Pauli Filipo Saena ma ona mātua le susuga Sili Peleti Saena ma le tina o Mele
O le susuga Matamua Falepauga Pauli Filipo Saena ma ona mātua le susuga Sili Peleti Saena ma le tina o Mele