“Ua momomo lo‘u loto ina ua ou oo atu i le nofoaga sa iai le Siva Afi, ua aveese uma meatotino ae o loo faatali le matou mataupu i le faamasinoga mo se taui”.
O le finagalo faaalia lea o le tamaitai loia, afioga Leuluaialii Olinda Woodroffe, i se feiloaiga ma tusitala na ia fofola mai ai le talosaga a le kamupani mo se taui tau tupe o meatotino a le Siva Afi ua aveesea mai le nofoaga sa iai i Sogi.
O le nofoaga lea ua fausia ai nei le maota fou o le Malo i Sogi, lea sa iai le Esetete Tausi a Samoa i tausaga ua mavae, sa faatuina ai le Siva Afi.
Sa lisi ai le kamupani i fanua o le Malo lea sa faatu ai le fale e lolomi ai mitiafu ma isi laei. Na mulimuli ane fausia ai se isi fale sa avea ma faleaiga ma se fale kalapu.
“O ai na te toe mafai ona saili le tau o galuega taulima sa vaaia i nisi o teuteuga o le fale, o se faanoanoaga tele lea ia te au ona ua lē vaai le Malo i le tāua o galuega a le susuga Lene ma si ona toalua”, o le saunoaga lea a le tamaitai loia o Leuluaialii Olinda.
O le isi itu faigata i le loia ona sa 30 ma ona tupu tagata faigaluega sa maua le faamanuiaga i galuega a le Siva Afi, ae o le taimi nei ua lē toe atoa se toa sefulu o le au faigaluega.
“O fea o iai le finagalo alofa o le minisita ma le Malo i nei tagata ua lē toe maua ni galuega”? E lē o manino mai i le folasaga a le loia pe fia le aofaiga o se vaegatupe o loo finauina o se taui mo le kamupani e mafua i le aveesea faamalosi o ana meatotino.
O le nofoaga i Matautu-tai e lata i le uafu sa amata ai le pisinisi a le susuga Lene Leota ma lona tolaua o Claire ua toe see i ai mo le taimi nei.
Fai mai le alii pule e lē o toe faia se faleaiga ma se pa pia ae ua na o se faleaiga aisikulimi e afe i ai le atunuu ma tagata tafafao, ona ua lē mafai ona toe faatelē le taumafaiga ona ua vaiti ma laitiiti le fanua ua toe faafoe ai lana pisinisi.
O le oo i le Famasinoga Maualuga o le tagi a le kamupani a Lene, o le a maua ai se tali i le mafatiaga o le ulugalii e ana le pisinisi.
O finauga muamua na oo foi i le faamasinoga lea na faatonuina ai ni feutanaiga i le va o le Malo ma le pulega o le Siva Afi.
Peitai e lei talia e Lene ma lona toalua le seleni na ofo atu e tapena ese ai lana pisinisi, ona e laititi ma o le mafuaaga lea o le toe ave o le mataupu i luma o le Malo
