Ua faamauina taumafaiga a faigamalo ua tuanai e soalaupule ma taitai o Amerika Samoa le feoai saoloto o tagata o Malo e lua e aunoa ma ni pemita e tau talosagaina.
O feiloaiga a taitai o Malo e lua sa faia i tausaga ua tuanai sa soalaupule ai pea lea mataupu peitai, ua fai si umi e lē o toe feiloai itu e lua i ana talanoaga masani i le Inter-Samoa talks.
O taumafaiga a Samoa Tutoatasi sa naunau ai e tatala le feoai saoloto e aunoa ma ni pemita auā e ui lava e eseese faigamalo e lua, ae o Samoa lava e tasi e tele faalavelave fai faaleaiga e mafua ai ona femalagaai tagata.
Ua toe lalaga mai le mataupu i le saunoaga faalauaitele a le faipule fou o Aleipata Itupa i Lalo i le Palemene, le afioga Tafua Maluelue.
O le finagalo o le sui faipule e lē tatau ona toe tatalaina le ofisa o le Konesula o Samoa ua iai i Tutuila pe afai o loo ulufale pea Samoa i Sisifo i Samoa i Sasae i pemita.
O le mataupu lenei na mafua ai ona liliu le Malo Tutoatasi ma faia loa pemita e ulufale mai ai tagatānuu o Tutuila ma Manu‘a, ae o tausaga e tele ua mavae sa malaga mai lava i latou e aunoa ma ni pemita.
Faaalia e le faipule i lana saunoaga o motu i Sasae o Samoa sa aofia i totonu o Atua ma o lona finagalo o le tasi lea vaega tāua o sootaga o tagata e tatau lava ona matala ai se finagalo e feoai tagata e leai ni pemita. E $400 afe se seleni o loo faatatauina i le tala autū o le tupe mo le faagaioia o le ofisa o le Konesula o Samoa i Amerika Samoa.
O le mau a le afioga Tafua Maluelue afai e lē o mafai ona faia e le ofisa lea se galuega e mafai ai ona feoai tagatānuu o Samoa Tutoatasi e aunoa ma ni pemita, ua tatau ona taofi lea seleni ma tapuni loa ma lea ofisa o le Malo o Samoa.
O le ofisa lea o loo mafai ona talosagaina ai e tagatānuu o Tutuila ma Manu‘a pemita e ulufale mai ai i Samoa Tutoatasi.
O pemita o loo talosaga e tagatānuu mai Samoa o loo lafo uma lava pepa i le ofisa o femalagaiga a Amerika Samoa e faia ai, auā e leai se ofisa o le faigamalo a Tutuila ma Manu‘a i Apia. E lē o mailoa pe toe faia ni talanoaga masani i le va o Samoa e lua e toe asiasi ai i le mataupu i pemita ulufale.
Popolega i vailaau oona i gataifale o Aleipata
O le uafu i Satitoa o loo iai ma le vaega e toso ai vaa, o se atugaluga lea o le afioga i le Tuiatua Faanofonofo ua tauaveina le tofi faipule o Aleipata Itupa i Lalo. O le mau a le sui sa ia talosagaina se lipoti tau i aafiaga o le siosiomaga mai lea atina‘e poo le evironment assesment impact report. Peitai o loo faatali pea poo afea e tuuina atu ai e le Matagaluega o Punaoa Faalenatura ma le Siosiomaga. O vali o loo vali ai vaega pito i lalo o vaa o loo tosoina i le uafu i Satitoa na faaalia a Tafua i le Palemene, o loo iai se ituaiga o vailaau oona.
O lona popolega pe a tafe le vali i le sami ona avea lea ma tulaga e aafia ai le gataifale o Aleipata aemaise o le malosi o le galu e lata i uta e vave ona tafia atu i ai le oona o vali ma aafia ai ma le laueleele.
O nisi o vaega na fautuaina e le sui faipule, o le faia o se fuafuaga a le Malo i le fale o loo iai le leitio a le Malo le 2AP. Faaalia e Tafua o le fale o loo iai nei e lē o toe saogalemu mo le faaaogāina e tagata faigaluega.
O le pa ua fuafua e siomia ai le Maota Fono i Tiafau faapea le lotoā atoa, o le isi lea faanoanoaga o le faipule. O lana mau o se pa o le a pupuni ai le saolotoga o tagata e afea auā o le tulaga lava lea sa iai mai le amataga.
