“E itiiti le tupe e alu ai, nai lo le totogi o komiti a le Malo ae leai ni galuega”…Palusalue
O aoaoga o le tasi o vaega tāua o fuafuaga o le atinae o le atunuu o loo ave i ai le faamuamua, ae o le molimau a le taitai o le Itu agai e iai vaega e tatau ona toe polesi lelei ina ia moni le faamuamua a le Malo o loo tala‘i pea.
I le faiga faavae mo le faaleleia o aoaoga a le Tautua Samoa ua faaalia ai e lo latou taitai le afioga Palusalue Faapo II, e tatau i le Malo ona iloilo se faiga e totogi ai sui pe toatolu o komiti a aoga auā e faigofie ai ona faatino le manulauti o le ave o fanau uma i le aoga auā o sui o nuu ma afioaga e faasino i ai se aoga.
“O le matou tilotilo i ai pe na o se miliona e alu ai i le tausaga pe afai e ave i ai se ta‘i selau tala i le masina, ae o le fitu miliona lea e totogi ai sui o komiti a le Malo e aofia ai ma le komiti o aoga o se tupe alu maumau, ae leai ni galuega o faia, ia poo fai foi ae lē o iloa ni fua aliali”, o le finagalo lea o Palusalue ina ua maua se feiloaiga ma le tusitala i le telefoni ona sa lē maua i ai se avanoa i le feiloaiga ma tusitala ma le Itu agai.
Faaalia e le taitai o le Itu agai ma le vaega faaupufai o le Tautua Samoa, o loo naunau le Malo e faamalosia le tulafono o le ave o fanau i le aoga, ma na pau le auala e mafai ona faatino ai aiaiga o le tulafono o komiti a aoga auā e faigofie ona fesootai ma mātua faapea aiga o nuu ma afioaga o loo aofia i le lio o nuu o le a ave a latou fanau i se aoga tulagalua a se nuu ma se itumalo.
O le finagalo foi o Palusalue e tele isi fuafuaga a le Matagaluega o Aoga a le Malo e mafai ona galulue soosoo tau‘au ai ma komiti a aoga i le faatinoga.
O komiti a le Malo o loo fitoitonu ma aoaoga na saunoa le taitai o le itu agai na te lē iloa poo ā latou galuega o loo fai, ae o loo tele fanau o loo vaaia o loo feoai solo i nuu e lē o avea i ni aoga. “O le itu lena e fai atu ai le matou itu e totogi sui o komiti a aoga”.
O se tasi o faafitauli o loo feagai ma aoaoga o le lē lava o faiaoga. Saunoa Palusalue o le isi lea tulaga ua tatau ona vaai i ai le Malo ia sii totogi o faiaoga pe ave i ai se alauni. Faaalia e le taitai o le itu agai o ni a latou sailiiliga sa faia na iloa ai, o faiaoga o loo iai faailoga o le Bachelor of Education pe na o le lua sefulu afe ma ona tupu le totogi i le tausaga, ae a silasila i isi tagata faigaluega a le Malo o loo galulue i isi matagaluega ae umia foi faailoga tai tutusa lava e sili atu i le 30 afe le totogi i le tausaga.
“O le mafuaaga lena ua faamavae ai nisi faiaoga ae talosaga i galuega i isi matagaluega a le Malo”, na saunoa ai Palusalue. O le tausaga e 2005 i le 2008 na faatino ai le siitaga o totogi a le Malo e aofia ai ma faiaoga.”
