O loo ua tele finauga i le tulaga ua iai fesoasoani o le afā o Eveni na aafia ai Samoa ona o le manatu o le Itu Agai o le Palemene e matuā lē talafeagai le fesoasoani ua tuu atu i le vaega o le atunuu ua matuā aafia i le afā faato‘a mae‘a atu ma le tali na ave i afioaga na aafia i le tsunami.
Faaalia e le taitai o le Itu Agai, le tofa Palusalue Faapo II o le vaega o le Vaimauga lea na aafia i le afā ma le pa pa o vaitafe, ua leai lava se eseesega ma le tulaga na oo i ai aiga ia na aafia i le tsunami ae o le taimi lenei ua na o le suavai ma le eletise ua maua e nisi o vaega o lea talafatai o le taulaga o le toe fausia o fale ua malepe ma ua matuā faaleagaina e leai ma se manatu o le malo e ave i ai se fesoasoani.
O le finagalo o le alii Palemia na tali atu ai i lea faitioga e eseese lava faalavelave e lua, o le tsunami na faitau selau tagata na maliliu ai ae o le afā lea e lei toatele tagata na maliliu ma aafia ma e lē na o le Vaimauga foi na faapea ona aafia ai ae na faapea foi ona aafia nofoaga e pei o Lefaga ma le atu Safata, Siumu faapea ma le atu Falealili.
Ta‘ua e Palusalue Faapo II, pe esese numera o tagata maliliu o aafiaga o loo manino aemaise i afioaga e pei o Magiagi, Lelata, Maagao ma Faatoia ma e faanoanoa tele ona o lea e foliga mai ua uma le fesoasoani e tuu atu i lenei itu o le Vaimauga ae e leai ma se fale o fesoasoani le malo i le toe fausia ae o lea ua fai mai faamatalaga e agai lava le aiga latou e fau o latou fale.
O lea foi ua agai le malo i le fai mai o faamatalaga o le masani lava a le Samoa o le toe tulai mai i taimi o faalavelave tetele faapea ma e lē tau faatali i ni fesoasoani mai i fafo poo le malo foi e toe fausia ai o latou fale.
Ua faapea mai foi le Malo o lea ua tatau ona agai ese tagata o nonofo i tafatafa o vaitafe mo lo latou saogalemu ae o le toatele e lē iloa poo fea a agai i ai ma e tatau ona silasila le malo i nisi nofoaga e agai i ai le toatele o lea itu o le Vaimauga.
Ua savali nei i le lua vaiaso talu ona tapunia le nofoaga o fesoasoani mo faalavelave faafuasei i Tuanaimato. Faapea mai nisi o aiga, o lea faatoa agai atu mo se fesoasoani ona e lei faamautu i nofoaga na sulufai i ai le toatele sa agai lava i aiga ae ua faapea mai le vaega lea e nafa ma tali o faalavelave faafuasei, ua matuā leai lava se fesoasoani o totoe mo i latou nei ua tuai le agai atu.