Na tagi i lima sailiga tupe e fausia ai le maketi e faatau ai fua o taumafaiga o atina’e tau faatoaga a le nuu o Laulii o se tasi o afioaga o le itumalo o le Vaimauga. Na saili i tama fanau a le nuu i fafo faapea sailiga sa faia lava i Samoa ma mafai ai ona fausia le maketi ua amata faaaogā nei. O le tasi foi lea o pine faamau o le atoaga o le selau tausaga o le lotu faamanatu a le nuu ua atoa le selau tausaga, ma ua faaigoa ai le maketi.
O le sauniga lotu e tatala ai le galuega na saunoa ai le faafeagaiga o le Ekalesia Aso Fitu o le toe afio mai i Laulii, ma ia faamanatu le maketi i Savalalo i Apia sa faatino ai pisinisi a nisi o tagata Laulii.
Fai mai le faifeau na te manatua ia aso ma tausaga ua tuanai a tupu se vevesi i le maketi i Apia e laumanu’ia solo ai i tala a tagata ma faapea, ai foi se Laulii”. O amioga ia a nisi o le nuu sa faaalia e le faifeau sa pei ai o ni sifi tagata Laulii i le maketi. Na faaalia foi e le faifeau le susuga Olive, o lea ua faatu le maketi a le nuu ma o nisi ia o uiga o tagata e toe faamanatu mai ai.
Sa tatala aloaia e le Minisita o Faatoaga ma Faigafaiva le afioga Lopaoo Natanielu Mu’a, le maketi a le nuu o Laulii ma lana tuualalo ia toaaga e atina’e le laueleele ma totō laau tau faatoaga auā o lea ua iai le maketi e faatau ai ma maua seleni e atina’e ai aiga ma le nuu aemaise o ekalesia. O le tatalaina o lea atina’e a le afioaga ua faaopoopo i se tasi o galuega tele sa tatala i ni tausaga e lei mamao atu o le hall mo meafai a le nuu ma le A’oga tulagalua a Laulii.
Ua iai foi se isi atina’e ua faagaioia ai ma o loo sosoo ma le maketi, o le faleoloa supamaketi o se alii faipisinisi mai Saina. Na faaalia e le Sa’ofaapito le afioga Leniu Vainiu Te’o, o se isi lea atina’e tau pisinisi ua maua ai tupe mo meafai a le afioaga. Na ia faaalia e $6,800 tala le totogi o le lisi a le faipisinisi i le masina. “O le isi mea e fia faailoa atu o tupe na fausia ai le maketi o tupe lava na saili e le nuu, ae leai se fesoasoani na maua mai le Malo”. Ua na’o le fausia o le hall na maua ai se fesoasoani mai le Malo e tolu afe tala.
